Biddaxidru: aprovau su Còdixi de rega polìtiga

S’«Assemblea Permanente» cun sa Truma tzìvica «Speras» ant aprovau su Còdixi de rega polìtiga: «Su tzitadinu arregit cun su tzitadinu – unu Còdixi de rega po Biddaxidru»

Còdixi de rega po Biddaxidru

Su 21 de gennàrgiu de su 2016, cun sa presèntzia de meda tzitadinus chi ant incartau su documentu, s’«Assemblea Permanente» cun sa Truma tzìvica «Speras» ant aprovau su Còdixi de rega polìtiga: «Su tzitadinu arregit cun su tzitadinu – unu Còdixi de rega po Biddaxidru».
Custu Còdixi est sa faina chi ant detzìdiu de impreai candidaus, sceraus, aministradoris e tzitadinus incartadoris.

Custa faina inditat unas cantu normas chi depint essi serretzadas de is chi tenint incàrrigus de scera o de inditu polìtigu e de is tzitadinus firmadoris etotu, po afiantzai una rega cussientziosa, reali, onesta, cristallina, lìmpia, giusta e sen’ ‘e partis po s’interessu de sa comunidadi e po sodigai su beni de totus.

Totu is cidresus, is assòtzius, is trumas polìtigas e culturalis de Biddaxidru chi arriciint custus fundamentus, funt cumbidaus a benni e a fai sa parti insoru po ponni a caminai unu progetu polìtigu chi giuit a sa comunidadi e chi tengat intra de is tareas suas is eletzionis comunalis de maju de su 2016.
Totu is tzitadinus tenint s’arraxoni ma tenint puru su doveri de traballai cun gana a sa polìtiga de sa bidda. Su Còdixi est una carta aberta a totus is chi bolint traballai po dd’ameliorai e si podit ligi in su giassu de s’Assemblea permanente (http://www.assembleavillacidro.it). Innia etotu s’at a cumentzai luegus unu dibatu apitzus de su Còdixi.

GLOSSARIO

  • afiantzai: garantire
  • aministradori/arregidori: amministratore
  • arraxoni: diritto
  • arrègiri: amministrare, governare
  • candidau: candidato
  • cussientziosa: diligente
  • de scera: elettorale
  • firmadori: firmatario
  • incartadori: firmatario
  • incartai: firmare, obbligarsi
  • inditu polìtigu: nomina politica
  • reali: leale
  • rega: etica, condotta
  • scerau: eletto
  • serretzai: osservare, rispettare
  • sodigai: raggiungere
  • tarea: obbiettivo