It’est sutzèdidu chida colada. Dae su 2 a su 8 de maju 2016

Su resumu de is novas prus de importu de chida colada pro is giornales

Pìndulas. 2 - 8 de maju 2016
  • Su Presidente americanu Barack Obama at atacadu su candidadu Donald Trump. “Sa Presidèntzia – at naradu – no est unu reality show. Tocat a ammentare bene su chi at decraradu in passadu. M’apensamentat s’ènfasi de is mèdios-massivos, ca is americanos meressent de èssere informados in manera curreta.”
  • Su Casteddu de Massimo Rastelli bi l’at fata. Binchende s’ùrtima partida contra a su Bari est torra in sa sèrie A de su campionadu de fùbalu.Cuntentesa manna intra de is tifosos e festa in sa tzitade e in totu sa Sardigna.
  • Giorgio Napolitano leat positzione pro su chi pertocat su referendum costitutzionale de su mese de ledàmine. Chi bincheret su no – at naradu – diat èssere una paràlisi definitiva, s’interru de is ideas de revisione de sa Costitutzione.
  • A cantu paret su cantante Prince est mortu ca fiat malàidu de AIDS. Ischiat dae ses meses de èssere cundennadu a mòrrere. L’ant agatadu cun acanta  pìndulas de meighinas e sa cosa podet fàghere pensare chi si nde siat leadu sa vida
  • Cundennadu in primu gradu, pro evasione fiscale, a tres annos de impresonamentu su patron de Tiscali  e europarlamentare Renato Soru. Dae in antis a sa sentèntzia Soru est partu ispantadu ma at apoderadu su rigore suo e mustradu dignidade manna. S’est luego dimìtidu de su ruolu de segretàriu regionale de su Pd.
  • Sa duchessa de Cambridge Kate Middleton, mugere de su prìntzipe William de Inghilterra, at a èssere in sa cobertedda de su giornale Vogue de su mese de làmpadas, pro festare is 100 annos de sa nàschida de sa rivista. Dd’aiat fatu prus de una borta puru sa mama de William, Lady Diana.
  • Sa Bce at detzìdidu de firmare sa produtzione de sa banconota de 500 èuros e sessare s’emissione a s’agabbu de su 2018, pro ite ca custa banconota paret chi potzat fatzilitare atziones illegales. In tames at a abarrare in su mercadu apoderende su valore chi tenet.
  • Unu muntone de adesiones pro s’initziativa de sa bidda de Ollolai de bèndere is domos betzas, chi cherent acontzadas, a su prètziu simbòlicu de un’èuru. S’ispera est cussa de torrare a donare vida a is biddas chi sunt sufrende pro s’emigratzione de is giòvanos. Sa matessi cosa a cantu paret dd’ant a fàghere àteras biddas sardas.
  • S’architetu brasilianu Mendes de Rocha at bìnchidu su Leone a sa carriera. Su reconnoschimentu si dd’ant a donare in sa XV Biennale de Venezia su 28 de maju, die de s’abertura ufitziale de sa manifestatzione.

de Manuela Ennas