S’ùrtima paghe de Lianora

Unu contu in subra de sa Paghe intre de su Giudicadu de s’ Arbarèe e su Rennu de s’ Aragona de su 1388

Sa paghe de Lianora

S’annu de Deus de su 1388 in Aristanis, sunt sas primas dies de su mese de ghennàrgiu e sa Giudichissa de s’Arbarèe Lianora, chi guvernat in nome de Mariane V su fìgiu chi est galu minore, est oriolada meda mentres chistionat cun Linardu su pìscamu de Santa Justa e cun Comita Panza su primu notòriu de su Rennu: est mortu Pedru IV de Aragona e Giuanne I su Catzadore su re nou, est unu òmine malu e chi mirat a gherrare e duncas bisòngiat luego a torrare a bìdere sa paghe firmada cun sos aragonesos in su 1386; sos aragones in prus tenet presoneri Brancaleone Doria, su maridu de Lianora.

Passada carchi die e sighende sos inditos de Lianora, su notòriu Comita Panza aiat iscritu unu testu nou pro sa paghe, chi como depiat a èssere sutascritu dae sos Majores de sas Biddas de su Rennu e de sas Curadorias; in cada curadoria Comita Panza aiat pensadu de imbiare unu de sos giòvanos notòrios chi aiat imparadu issu e totu: unu de custos, Giuanne de Altana de sa bidda de Gulusò, fiat destinadu a andare a fàghere firmare sos interessados de sa curadoria de su Montagudu in sa tzitade de Otieri, in ue amministraiat sa 17 biddas Fulcu de Sù chi fiat su sìndigu e su procuradore de sa curadoria. 

Dae Otieri Fulcu de Sù, aiat imbiadu unu soldadu pro cunvocare sos Majores de sas Biddas in Otieri a pustis de una Corona de Bidda pro detzìdere si cheriant sa paghe o nono. In sa bidda de Onanie su Majore de Bidda fiat Frantziscu de Lacon, unu chi fiat istadu sordadu de Mariane IV de Arbarèe e chi si nche fiat cojubadu in cussa bidda, cun unu fèmina galana numenada Elene Deyana. 

Cunvocada sa Corona de Bidda, s’ incras Frantziscu de Lacon in paris cun sos jurados e sos probòmines de Onanie andat in Otieri in ue declarat in paris a issos de nàrrere “emmo” a sa paghe.  Torradu in Onanie, Frantziscu de Lacon est sètzidu in domo sua cun sa mugere Elene pòmpiat cun oriolu mannu a su cras de sos fìgios suos. Elene dimandat a Frantziscu si pensat chi sa paghe intre de s’Arbarèe e de s’Aragona at a durare meda: Frantziscu tando respondet chi s’isperu est chi sa paghe duret, ca si-nono sos fìgios issoro non ant a èssere òmines lìberos, ca issu connoschet sa fortza de sos catalanos e fintzas cantu issos podent èssere malos. Frantziscu ammentat puru chi est istadu sordadu dae cando teniat 11 annos e como chi at passadu sos 50 no at prus gana de gherrare. Su contu s’agabbat cun Elene chi dimandat s’amparadura pro Onanie a Santu Pretu e a Sant’Elene e Frantziscu de Lacon chi rispondet: “Amen!”.

Custu est unu resumu de unu contu iscritu leende ispuntu dae sa trascritzione de Pascale Tola in subra de sa Paghe intre de su Giudicadu de s’ Arbarèe e su Rennu de s’ Aragona de su 1388. Su testu, in ue s’agatant personàgios beros e personàgios imbentados, est istadu lèghidu dae tres pitzinnas in ocasione de “Atonzu in Barbàgia 2014” in su mese de santugaine in Onanie.

Sas tres pitzinnas, chi frecuentaiant sas iscolas medias in Lùvula, cun sa ghia de s’operadora Lidia Contu e dae s’operdore de su Ufìtziu Limba Sarda in pagas dies ant imparadu a lèghere su testu in subra de s’ùrtima paghe de Lianora, iscritu in Limba Sarda Comuna, cun sa pronùntzia onaniesa. Sos resurtados sunt istados ispantosos. Totus is chi sunt bènnidos, pitzinnos, babos, mamas e pùblicu, ant ammustradu de àere agradèssidu meda su traballu fatu.

de  Mario Sanna