Prèmiu Ubu 2017 a Macbettu

Macbettu est su mègius ispetàculu de s'annu. Cuntentesa manna pro su teatru sardu.

Macbettu, una produtzione de Sardegna Teatro e Teatro Persona, cun sa regia de Alessandro Serra, est su «mègius ispetàculu de s’annu». Est custa sa sceda de su “Prèmiu Ubu 2017”, su prus reconnoschimentu mannu in su setore teatrale natzionale. Macbettu est totu in limba sarda. Est sa primu borta chi a bìnchere custu prèmiu est un’òpera in limba sarda. Su traballu de su regista tenet s’originalidade manna de ambientare sa tragèdia de Shakespeare in una Sardigna arcana, a beru sena tempus, sena logu e sena pregiudìtzios, finas a dda ispìnghere a is làcanas de s’istòria casi comente in unu poema omèricu. E no isceti pro carchi riferimentu chi est fàtzile a agatare, comente pro nàrrere s’iscena in ue is tzeracos, chi Lady Macbeth faghet dormire cun su binu, benint mudados in porcos e nos ammentant is cumpàngios de Odisseo ammajados dae Circe. Puru is sentidos tenent unu simplitzidade “primitiva” de is cosas, pròpiu comente in is poemas de is tziviltades arcàicas: sentidos artos, eròicos fintzas a dae in antis de su peus chi potzat lòmpere dae su coro de s’òmine.

“Ispantosos totu is tretos in comune, is analogias intre su traballu perfetu shakespeariano e is viseras de sa Sardigna chi sunt is protagonistas berdaderas de su Macbettu. Trastos antigos, peddes de animales, ortigu. Sa potèntzia de is gestos e de sa boghe, ma puru de su mudìmene”.

Sa bellesa de su ballu e de is càntigos. Ancora viseras, binu, sàmbene, ierru. Unu bòidu in ue is atores pintant figuras de sa memoria e logos chi esistint petzi in is bisos. Pedras, terra, metallos, ammentos nuràgicos…totu s’ammèsturat in unu iscarteddu primordiale, Shakespeare e Sardigna, sena chi bi siat una partzidura.

Comente cheret sa traditzione de s’època de su Macbeth de Shakespeare, in su Macbettu ddoe retzitant petzi òmines: Fulvio Acollis, Andrea Bartolomeo, Leonardo Capuano, Andrea Carroni, Giovanni Carroni, Maurizio Giordo, Stefano Mereu, Cuntentu Montervino. Su regista ,a sa noa de su prèmiu, at torradu gràtzias a su pùblicu chi at mustradu de agradare custu traballu giai a s’inghitzu e pruschetotu a Massimo Mancini, diretore de Sardegna Teatro e Valeria Ciabattoni, diretora artìstica de su Cedac, chi ant acollidu luego su progetu cun enstusiasmu.

de Manuela Ennas