Museu Man: Woman (are beautiful) de Garry Winongrand

Finas a su 9 de su mesi de ladàmini sighit in su Man de Nùgoro sa mosta de Garry Winongrand Woman (are beautiful)

Garry Winongrand in su Man

Cun sa mosta de Garry Winongrand est torrada a su MAN de Nùgoro sa fotografia artìstica internatzionali. Pustis s’arrennèscida de s’annu passau, cun sa mosta de Vivien Maier, su museu at apariciau custu progetu dedicau a Garry Winongrand, chi po is amantiosus de sa fotogràfia est su babbu de sa street photography.

S’arti de Winongrand benit posta a pari cun cussa de Vivian Maier poita ca issu puru, comenti Maier, at fotografau is bias de sa citadi americana, eus a nai de New York. Winongrand at portau a innantis unu traballu pibincu de reportage chi dd’at fatu unu de is prus fotografus famaus de is annus sessanta e setanta: is fotografias suas ddas ant pubricadas rivistas comenti Sports Ilustrated, Life e Fortune.

Su sogetu suu est su citadinu disconnotu de New York, fotgrafau sèmpiri in logus pùbricus – parcus, centrus comercialis, arioportus, museus -. Sa tènnica de Garry Winongrand est famada po s’impreu de s’àngulu mannu de sa màchina fotogràfica. In custa manera acanta e apalas a su sogetu principali nci funt unu niaxi de àterus particularis chi no stròbant po nudda e no ddu smènguant ma nd’ammanniant po finas s’importu, cosa chi difatis fiat sa tarea de s’artista.

Sa mosta de su Man est titulada Woman (are beautiful), comenti unu lìburu de su 1975 de Garry Winangrand, chi oi est stimau in manera casi religiosa de is amantiosus de custu fotògrafu. Po sa primu borta funt presentadas in Itàlia is imprentas originalis de is fotografias de su libùru chi – comenti si cumprendit giai de su tìtulu – funt totus arretratus de fèminas.

In cust’òpera sa figura feminili est espressada in manera sintzilla: cussu chi benit a pillu est una reflessioni funduda apitzus de s’idea de bellori feminili, a sa manera de su movimentu de sa contracultura americana filla de sa beat generation, un’dea chi celebrat s’emancipatzioni feminili de cussus annus.

Sa musta est a incuru de Lola Garrido, studiosa ispanniola de s’arti chi est stètia responsàbili de s’arregorta de sa Fundatzioni Banesto, chi oi s’agatat in su Museu Reina Sofia de Madrid.
Woman (are beautiful) at abarrai aberta finas a su 9 de su mesi de ladàmini. Po informatzionis http://www.museoman.it/it/mostre/mostra/mostra/Garry-Winogrand/

de Massimiliano Meloni