In Amèrica passat s’arreforma fiscali de Trump

S’arreforma fiscali bòfia de Trump smenguat is tassas po is aziendas de su 35% a su 21% ma est posta in duda meda

Arreforma fiscali de Trump

Su Cungressu americanu at aprovau s’arreforma fiscali bòfia de Trump. Is tassas po is aziendas calant de su 35% a su 21%.

Su Presidenti de is Stadus Unius, chi iat promìtiu giai in su mesi de abrili de smenguai is tassas finas a su 15%, me is tratativas in su Senau at dèpiu acetai de calai sceti finas a su 21%.

S’arreforma fiscali est posta in duda meda. Po is sondàgius, cuntestaus de Trump, sa majoria de is intervistaus est contràriu.

At fatu chistionai meda, po esèmpiu, su sondàgiu de s’Universidadi Quinnipiac chi afirmat chi sceti su 29% de is intervistaus est a favori.

Po cussus chi funt a favori de s’arreforma fiscali, sa smenguadura de is tassas at a permiti a sa genti de consumai de prus. In custa manera is aziendas ant a podi imbistiri prus dinai in ideas novas. Prexiau meda Trump chi luegu at nau chi s’arreforma est una bìncida po is famìlias, is traballadoris e is aziendas.

Su New York Times at marcau chi a otenni profetu de sa smenguadura de is tassas ant a essi po primu pròpriu is aziendas de su Presidenti.

Po is contràrius, s’arreforma fiscali de Trump prèmiat a is prus arricus e a is aziendas prus mannas e no prèmiat su cetu de mesu. In prus at a ammanniai su deficit federali finas a 1.400 milliardus de dòllarus me is dexi annus benidoris. De aici at a ingendrai àteras smenguaduras de sa spesa pùbblica e duncas àterus sbantaxus po su cetu de mesu.

de Massimiliano Meloni