Su guvernu de s’Algeria arreconnòsciit s’annu nou de is bèrberus

Pustis is protestas de pagu cidas fait su guvernu algerinu arreconnòsciit sa festividadi de s’annu nou e s’imparu de sa lìngua de is bèrberus de s’Algeria.

bèrberus de s’Algeria

Su Presidenti de s’Algeria Abdelaziz Bouteflika, in ocasioni de is norabonas po s’annu nou, at fatu sciri chi sa festa de s’annu nou de is bèrberus, chi si festat su 12 de su mesi de gennàrgiu, at a essi arreconnnota de su Stadu comenti festa natzionali.

Pagu oras prima su ministru de s’istrutzioni de su Stadu nordafricanu Nuria Bin Ghabrit iat annuntziau un’àtera nova de importu po is bèrberus: sa lìngua insoru – su tamazight – at a essi imparada me is scolas de totu su Stadu.

Sa minoria stòrica e linguìstica de is bèrberus est presenti in totu s’Àfrica de su Nord, innui bivìat giai prima de sa lòmpida de is Romanus. Oindì is bèrberus funt prus de 36 millionis, 20 millionis sceti bivint in Marocco – innui funt sa maioria de sa popolatzioni – 13 millionis in Algeria. Is àterus bèrberus funt spaniaus me is àterus stadus de su nord Àfrica, ma si nd’agatant in Niger e in Mali puru – is tuareg famaus funt bèrberus -.

Torrendi a s’Algeria, tocat a nai chi is duas novas arribant pustis cidas de protestas portadas a innantis de is bèrberus de sa regioni de sa Cabìlia – protestas sìmilis nci funt stètias in Marocco puru, in sa regioni de su Rif -.

Sa pregunta de un’arreconnoscimentu prus mannu de s’identidadi insoru de parti de su Stadu is bèrberus dd’ant portada a innantis giai in època coloniali, e protestas mannas nci funt stètias me is annus ’80 – contra a sa polìtica de arabisatzioni bòfia de su guvernu – e in su 2001.

In su 2008 su guvernu algerinu iat arreconnotu sa lìngua bèrbera comenti lìngua natzionali e in su 2016 dd’iat introdùsia in sa Costitutzioni, ma no fiat fatzili a dd’imparai me is scolas.

de Boxis