UFO. Su Ministeru de s’Amparu americanu ddus at spriculitaus finas a pagu tempus fait

Su Ministeru de s’Amparu americanu at spèndiu 22 millionis de dòllarus po portai a innantis unu Programma segretu po spriculitai apitzus de is UFO

Programma apitzus de is UFO

Su Ministeru de s’Amparu de is Stadus Unius at portau a innantis, de su 2007 a su 2015, unu programma segretu po spriculitai apitzus de s’esistèntzia de is UFO. Su programma, chi est costau 22 millionis de dòllarus, dd’iant bòfiu tres senadoris de su Cungressu americanu. Is tres senadoris iant detzìdiu chi sa cosa depiat abarrai cuada, po no ndi depi chistionai in su Senau.

Dd’at scoviau su New York Times, chi at intervistau su responsàbili de su programma puru, un’ex funtzionàriu de is servìtzius segretus americanus chi ddi nant Luis Elizondo.

Su Programma, titulau “Advanced Aerospace Threat Identification Program”, eus a nai “Programma avantzau po s’arreconnoscimentu de is ameletzus aeriospatzialis” at spriculitau apitzus de càstius de ogetus volantis duraus cidas interas.

Is UFO pariat chi accelerànt de suncuna a velocidadi ispantosa. Sa cosa dd’ant testimongiada finas duus uficialis de sa marina americana.

Parit chi in su 2004 is radars de sa navi insoru, chi fiat in s’Ocèanu Paxosu, apant registrau ogetus volantis chi cumparriant in su celu, tufànt in mari e poi si torrànt a firmai in su celu.

Su fatu chi is Stadus Unius apant portau a innantis custu programma no bolit nai chi dd’ant fatu sceti po spriculitai apitzus de is extraterrestris. S’astrofìsica de su MIT Sara Seager at spiegau a su New York Times chi is càstius de is ogetus volantis no funt sceti de acapiai a is extraterrestris, e a bortas nci funt fenòmenus strammus chi sa scièntzia depit spriculitai e totu mancai no tèngiant una spiegatzioni.

Is Stadus Unius ant giai tentu, pustis sa Segunda gherra Mondiali, unu progetu de stùdiu apitzus de is UFO, chi ddi narànt “Project blue book”. De su 1947 a su 1969 s’arionàtica at spriculitau prus de 12 milla càstius. Sa maioria fiant steddus, nuis, arioplanis. Ma prus de 700 funt abarraus sena de una spiegatzioni.

de Massimiliano Meloni