Sa Cummissioni UE detzidit penas contra a sa Polònia, incurpada de violai is valoris de s’Europa

Sa Cummissioni UE at ativau po sa primu borta s’art. 7 de su Tratau contra a sa Pòlonia, pruschetotu po s’arreforma sua de sa Giustìtzia

Sa Cummissioni UE ativat s’art.7

Sa Cumissioni europea at detzìdiu oi de portai a innantis una filera de penas contra a sa Polònia, incurpada de ai violau is Trataus europeus in unus cantu de leis aprovadas me is ùrtimus mesis de sa maioria natzionalista e cunservadora.

Bruxelles cuntestat trexi leis aprovadas de Varsàvia ma pruschetotu s’arreforma de sa Giustìtzia, chi annuddat s’indipendèntzia de su poderi giuditziàriu e ddu assutat a su poderi polìticu, ca su Ministru de sa Giustìtzia at a essi puru Procudadori Generali e at a podi nomenai is giugis ordinàrius e is cumponentis de sa Corti Suprema e de su Tribunali costitutzionali.

Po sa primu borta in s’istòria de s’Unioni, sa Commissioni europea at ativau s’artìculu 7 de su Tratau, chi prebidit penas chi podint arribai finas a sa smenguadura de is agiudus e a sa suspensioni de su diritu de votu in su Consillu UE.

“No eus pòtziu fai in àtera manera, depeus defendi is valoris e su spìritu de s’Europa” at nau su Visupresidenti de sa Commissioni Frans Timmermans, donendi sa nova a is giornalistas.

Lestra sa reàtzioni de su Pis, su partidu de maioria ghiau de s’ex premier Jaroslaw Kaczynski, chi at nau chi custa decisioni dd’ant pigada po puniri sa Polònia po nexi de sa polìtica sua de arrefudu de is migrantis. Kaczynski est amigu meda de su premier ungheresu Viktor Orban, chi dda pensat in sa matessi manera apitzus de arrefudu de is migrantis e contrariedadi a s’Europa.

Sigumenti s’ativatzioni de s’art. 7 dda fait sa Cumissioni europea ma, po intrai in vigori is penas, dda depint votai totus is stadus membrus de s’UE, capassu chi s’Ungheria at a votai contra.

de Massimiliano Meloni