Prèmiu Nobel po sa paxi a Juan Manuel Santon Calderòn

Calderòn, Presidenti de sa Colòmbia, at arreciu su Nobel po su traballu suu po firmai sa gherra civili chi sighit de prus de 50 annus

Su Prèmiu Nobel a Calderòn

Su Prèmiu Nobel nou po sa paxi est Juan Manuel Santon Calderòn, su Presidenti de sa Colòmbia. Calderòn at arreciu su Nobel poita dd’ant bòfiu arreconnosci s’importu de su traballu fatu po portai sa paxi in sa Natzioni sua, pustis dexinas de annus de gherra civili.

Su Nobel a Calderòn arribat pagus diis pustis su referendum de su 2 de ladàmini passau, innui su 51,3% de is colombianus at arrefudau s’acòrdiu de paxi. Poita duncas cust’arreconnoscimentu?

Is giugis funt bòfius andai contra a su resultau de su referendum – pighendi una decisioni spantosa – po agiudai sa natzioni sudamericana a no perdi s’ocasioni de arribai a sa paxi.
Difatis immoi su Presidenti at a tenni una legitimatzioni de importu po sighiri is negotziaus, mancai s’arresultau de su referendum.

Parriat cosa fata, candu in su mesi de Austu passau su Guvernu colombianu e is Farc iant firmau unu primu acòrdiu in Cuba po pònniri fini a is batallas e fraigai sa paxi. S’acòrdiu de paxi firmàt una gherra civili inghitzada in su 1964, s’annu de nàscida de su movimentu marxista revolutzionàriu de is Farc (Fuerzas Armadas Revolucionarias de Colombia). In custus 52 annus sa gherra at fatu prus de 260 milla mortus, 46 milla personas sparèssias (desaparecidos comenti narant in Amèrica latina), casi 7 millionis de disterraus e unu niaxi de vìtimas de crìminis diferentis.

Epuru sa popolatzioni colombiana at nau no a sa paxi. S’acòrdiu definitivu firmau a Cartagena su 26 de su mesi de cabudanni no at passau su referendum. S’opinioni pùbblica colombiana no agradessit chi is Farc potzant sighiri sa batalla insoru, mancai sena de armas, comenti unu de is àterus partidus polìticus normalis. Difatis s’acòrdiu prebidit chi is Farc ant a depi tenni indiritura una rapresentàntzia mìnima de cincu deputaus e cincus senadoris, giai de is eletzionis de su 2018. S’àtera cosa, forsis sa prus de importu, chi s’opinioni pùblica no agradessit, est chi is gherradoris no ant a depi pagai po medas de is culpas insoru.

Tocat a biri chi su Nobel a su Presidenti Calderòn at a permiti de convinci is prus dudosus chi sa paxi est mellus de sa gherra.

de Massimiliano Meloni