S’ex campioni de palloni George Weah est su Presidenti nou de sa Libèria
George Weah at bintu is eletzionis in Libèria cun su 61,5% de is votus e est su Presidenti nou de su Stadu Africanu.
S’ex campioni de palloni de su Milan George Weah est su Presidenti nou de sa Libèria. Dd’ant elìgiu cun su 61,5% de is votus.
Weah at bintu su ballotàgiu contra a su visupresidenti de su Stadu africanu Joseph Bokai. In su primu turnu iat pigau su 38,4% de is votus e s’aversàriu suu su 28,8%.
At a arremprasai sa Presidenta Ellen Johnson Sirleaf, primu fèmina a cabu de unu stadu africanu e bincidora puru de su prèmiu nobel po sa paxi in su 2011. Weah at a intrai in càrriga su 22 de su mesi de gennàrgiu chi benit.
Fiat sa segunda borta chi Weah fiat candidau a essi Presidenti. Sa primu, in su 2005, iat pèrdiu contra a sa Presidenta in càrriga. In su 2011 si fiat presentau un’àtera borta comenti visupresidenti de su candidau Winston Tubman, ma iat pèrdiu ancora.
Comenti sportivu Weah at bintu 3 copas de Fràntzia (2 cun su Monaco e 1 cun su Paris Saint Germain), 1 Campionau e 1 Copa de Lega frantzesus cun su Paris Saint Germain, 2 campionaus italianus cun su Milan e 1 Copa d’Inghilterra. At bintu 3 bortas su tìtulu de giogadori africanu de s’annu (1989, 1994, 1995) e pruschetotu su Palloni de Oru in su 1995, candu giogàt in su Milan.
de Boxis
