It’est sutzèdiu cida passada. De su 11 a su 17 de Gennàrgiu

Su resumu de is novas prus de importu de cida passada po is giornalis

Pìndulas. 11-17 de Gennàrgiu
  • In su mundu su terrorismu islàmicu at spaniau morti custa cida puru :
    Martis in Ìstanbul – Turchia -, unu kamikaze s’est fatu sartai in ària in su centru de sa citadi, in sa Pratza Sultanhamet, logu famau e abitau de is turistas. Is mortus funt stètius 10 – intra de issus 8 tedescus – 15 is ingotus. Su kamikaze fiat unu pròfugu sirianu chi iat pediu su deretu d’asilu a is autoridadis turcas. S’atentau est stètiu vengau de s’Isis. Giòbia in Giacarta – Indonèsia -, una filera de atentaus at fertu su centru de sa citadi, in logus abitaus de is ocidentalis e acanta de is ofìtzius de s’ONU. Ses esplosionis – unu kamikaze s’est fatu sartai in ària innantis de unu Starbucks – e unus cantu de sparadòrias ant lassau 7 mortus in terra e ant ingotu 19 personas. Custu atentau puru est stètiu vengau de s’Isis. Cenàbara in Somàlia is militantis de Al-Shabaab, sa truma terrorista sòmala, ant afisciau una basi militari de s’Unioni Centru-Africana in sa làcana cun su Kènia. 60 sordaus mortus. Sàbudu in Ouagadougou, sa capitali de su Stadu africanu de su Burkina Faso, una truma de terroristas at afisciau un’albergu innui s’agatànt pruschetotu òspitis ocidentalis ca is ofìtzius de s’ONU funt inguni acanta. Is mortus funt 23, de 18 natzionalidadis diferentis. S’atentau est stètiu vengau de Al-Qaeda. Est su primu atentau de sìnniu islamista in custu Stadu, innui su 50% de sa popolatzioni est musulmana, su 30% cristiana e su 20% animista.
  • Al Qaeda amaletzat a s’Itàlia po cussu chi est fadendi in Lìbia. Po sa truma terrorìstica s’Itàlia at ocupau Trìpoli. Sa cosa parit strama, ma po sa beridadi s’opinioni pùbrica sciit pagu a pitzus de cantu s’Itàlia est faendi in Lìbia, pruschetotu po defendi is logus innui est presenti s’Eni.
  • Pustis noi annus funt stètias annulladas is santzionis econòmicas de sa comunidadi internatzionali contra a s’Iran. S’abolidura est arribada pustis s’acòrdiu firmau a Vienna intra de s’Iran e sa truma de Stadus 5+1 (Stadus Unius, Rùssia, Gran Bretànnia, Fràntzia, Cina, Germània) su mesi de Argiolas passau a pitzus de su programma nucleari iranianu.
  • Nova lègia po totus is amantiosus de sa mùsica: a s’edadi de 69 annus est mortu David Bowie.
  • Su Premier Matteo Renzi at nuntziau chi si issu at a perdi su referendum a pitzus de is reformas costitutzionalis – prebìdiu po su mesi de ledàmini benidori – at a lassai sa polìtica.
  • Renzi e su Presidenti de sa Commissioni Europea Juncker sighint a si ferri de atesu. Pustis is fueddus de Renzi contra a su comportamentu serbili de sa Commissioni cun sa Germània, Juncker at nau chi su Premier italianu no si depit permiti de ofendi is istitutzionis europeas.
  • Su Nàpoli at bintu su gironi de andada de su campionau de sèrie A. Est campioni de ierru.
  • Casteddu: s’Assessori Regionali a sa Sanidadi Luigi Arru  at nuntziau chi est nàsciu su Registru Regionali po is tumoris.
  • In Sardìnnia est lòmpiu s’ierru. Temperaduras bàscias, frius  e nii pustis mesis de basca.

de Massimiliano Meloni