It’est sutzèdidu chida colada. Dae su 18 a su 24 de Ghennàrgiu

Su resumu de is novas prus de importu de chida colada pro is giornales

Pìndulas 18-24 de Ghennàrgiu
  • Immoe est ufitziale. Su 2015 est istadu s’annu prus caente de semper. De cando in su 1880 sunt incumentzadas is rilevaduras iscientìficas de is temperaduras globales. Dd’at fatu ischire sa NASA.
  • Apple at a abèrrere in Itàlia, in sa tzitade de Nàpoli, su primu tzentru europeu pro isvilupare su sistema operativu iOS de s’azienda californiana. Su sèberu de Tim Cook at ispantadu su mundu de sa tecnologia.
  • A s’agabbu de sa partida de fùbalu intre de Nàpoli e Inter, s’allenadore Sarri at pigadu a faeddos malos a s’allenadore Mancini. Dd’at naradu chi fiat unu caghineri. Sa cosa at pesadu polèmicas medas, non petzi in su mundu de su fùbalu. Sarri est istadu iscualificadu pro duas giorronadas de Copa Itàlia.
  • Pietro Maso torrat in is pàginas de is giornales. Pustis de 22 annos de presone pro àere ochidu su babbu e sa mama, paret chi siat a suta de indàgine pro estorsione. Is sorres narant chi podet èssere galu perigulosu.
  • Tempos malos pro s’economia. Is bancas italianas a suta de un’atacu ispeculativu. Su tìtulu Monte de Paschi est istadu suspèndidu in Borsa. Ma su premier Renzi at chircadu de asseliare is italianos chi timent pro is rispàrmios issoro.
  • “Ant bìnchidu is clans de sa Camorra”. Cun custos faeddos su sìndigu de Quarto, Rosa Capuozzo, at lassadu s’incàrrigu, pustis de is indàgines a pitzu de agiudos illètzitos de sa Camorra pro is eletziones e s’avolotu in su partidu suo, su “Movimento Cinque Stelle”.
  • Sa Tunisia est ruende in disaura. Rebellias populares, protestas, vandalismu sunt ponende suta assìtiu is autoridades, chi timent fichiduras terrorìsticas puru. Su Ministru de s’Internu at decraradu su coberrefogu in totue.
  • Degòlliu ferroviàriu in Casteddu. Duos trenos de sa metropolitana lèbia si sunt atumbados. Prus de 70 pessones feridas. Sa Procura at abertu un’indàgine pro cumprèndere de chie est sa neghe. Isbàlliu umanu o tècnicu?
  • SvegliaItalia! Custu est su slogan chi at annoditadu is manifestatziones in is pratzas italianas pro is deretos de is omosessuales e pro sustènnere su disignu de lege a favore de is uniones tziviles intre pessones de su matessi sessu.

de Manuela Ennas