Beppe Severgnini: sas terras a sos immigrados

Semus faeddende de s’artìculu de Beppe Severgnini in ue at propostu de dare sas terras de Sardigna a sos immigrados.

Beppe Severgnini e gli immigrati

Sa fantasia si podet impitare bene o male. Nois pessamus chi Beppe Severgnini, su giornalista famadu, custa bia l’apat impitada male. Semus faeddende de s’artìculu in ue at propostu de dare sas terras a sos immigrados.

Est reale su problema, antzis, sos problemas chi at postu in campu: a un’ala, su drama de sos rifugiados, a s’àtera, s’ispopulamentu de sa Sardigna. Est importante su giornale in ue at iscritu: su New York Times. Est de pessone istudiada su riferimentu istòricu chi at fatu: sos tzenturiones romanos chi, cando sessaiant de andare in gherra, lis daiant unu cantu de terrinu de magonire.

Ma sas ideas sunt bonas cando funtzionant. In custu casu, s’aplicatzione cuncreta de sa proposta de Beppe Severgnini diat pòdere fàghere petzi dannu. Tantu pro cumintzare, sos rifugiados chi sunt acudidos a inoghe non sunt tzenturiones romanos: issos in custa Sardigna ispopulada non bi cherent abbarrare, ma cherent andare a sas tzitades mannas, mègius si in su Nord Europa. A parte custu, b’at de nàrrere chi a fàghere   agricultura in Sardigna no est a andare a passìgiu: l’ischint bene sos pastores e massajos chi cada die devent gherrare cun unu muntone de dificultades. E tando a impreare sos rifugiados in sos campos cheret nàrrere petzi duas cosas: o los pagant pagos soddos, e tando est isfrutamentu; o lis dant cuntributos, e tando los ponent in cuncurrèntzia siat cun sos sardos chi istant in Sardigna siat cun sos sardos custrintos dae sa crisi a si nch’andare a foras, provochende tensiones sotziales chi non nos podimus permìtere.

Dispràghidu dae su cuncordu de crìticas chi s’est pesadu contra a issu, su giornalista Beppe Severgnini s’est chessiadu, narende chi no est giustu a andare contra a chie tenet ideas, e chi semus bonos petzi a nos lamentare.

Nono, no est gasi. Sas ideas devent tènnere currispondèntzia cun su mundu reale. E sa realidade est chi in Sardigna non bi sunt, o bi sunt tropu pagu, sas cunditziones pro creare richesa. Duncas, sa gente si nche fuit. Cun pagos interventos de sustàntzia si diat pòdere torrare a pònnere in movimentu s’economia, dende traballu a sos sardos e, pro ite nono, fintzas a sos istràngios. Diat bastare, pro nàrrere, a nche bogare su monopòliu de sos trasportos, pro fàghere abbassare sos prejos relativos, a nche batire su metanu, pro fàghere minimare su preju de s’energia, a finantziare cun dinare pùblicu atividades in limba sarda e in sas limbas alloglotas, interventos chi, sigomente pertocant una minoria linguìstica, non diant èssere botzados in cantu “agiudos de istadu”. E si diat pòdere aplicare comente si tocat su Tìtulu 3 de s’Istatutu sardu, faghende abbarrare inoghe sa pertzentuale de tassas chi nos tocant. Ma, pro fàghere custu, bi cheret unu guvernu sardu chi òperet in su bonu. Non bi cheret tzarra.

de Sarvadore Serra