Tres class action contra a Apple

Sa Apple denuntziada po ai rallentau is IPhones prus bècius cun is agiornamentus.

Class action contra a Apple

Funt partidas in Amèrica tres class action – denùntzias colletivas – contra a Apple, pustis chi s’azienda de Cupertino at amìtiu de rallentai a posta is IPhone prus bècius po mori de is agiornamentus.

Apple sciat chi sa sostitutzioni de sa bateria de is IPhone iat a ai mellorau sa performance de is telèfonus” ddoi est scritu in una denùntzia presentada in unu tribunali de su Stadu de s’Illinois.

In sa denùntzia presentada in Los Angeles invecis s’azienda dd’ant incurpada de ai rallentau a posta is telèfonus cun is agiornamentus mentris in sa denùntzia presentada in sa California de su Nord narant chi Apple prima de amiti su rallentamentu at donau informatzioni frassas, po cuai sa cosa.

Po Apple, is agiornamentus serbint a allonghiai sa vida de is Iphone, agiudendi is baterias, chi sinuncas, andendi a innantis con s’impreu si guastant.

Po immoi Apple no at tentu dannu in Bussa ca is atzionis no dd’ant sunfriu, ma tocat a biri me is mesis chi benint.

de Boxis