Obertu su primu curridòriu umanitàriu de sa Lìbia a s’Itàlia

Po mori de unu curridòriu umanitàriu funt arribaus in Itàlia 162 disterraus chi fiant presoneris me is centrus de sa Lìbia

Curridòriu umanitariu po is disterraus

Po mori de unu primu curridòriu umanitàriu obertu de s’Unhcr, s’Agentzia de s’Onu chi pertocat is disterraus, funt arribaus in Itàlia de sa Lìbia 162 migrantis chi fiant presoneris me is centrus de presonia po migrantis irregularis de su stadu africanu.

Is 162 disterraus ddus at scioberaus me is mesis passaus s’Unhcr intra de cussus prus dèbilis chi s’agatànt me is centrus.

Is disterraus arribant de s’Eritrea, de s’Etiopia, de sa Somàlia e funt pruschetotu pipius, fèminas, bècius, finas disàbilis. Su curridòriu umanitàriu nascit de un’acordu intra de su guvernu italianu e de su guvernu lìbicu.

Is disterraus ant lassau sa Lìbia cun duus arioplanus militaris chi de Tripoli ddus ant portaus a s’arioportu militari de Pràtica di Mare.

In Itàlia, po mori de un’acordu intra de su guvernu e sa CEI – Cunferèntzia Episcopali Italiana -, ant a essi acòllius in sexi diòcesis italianas. Totus ant a tenni sa protetzioni internatzioni e ant a fai parti de unu programma de integratzioni.

A arriciri is disterraus in arioportu ddoi fiant su Ministru de s’Internu Marco Minniti e su Presidenti de sa CEI Gualtiero Bassetti. Po su Ministru “Est una dì stòrica ca seus arrennèscius a salvai fèminas e pipius, e ddus eus salvaus de is traficantis de òminis” Su Presidenti de sa CEI at torrau gràtzias a su guvernu italianu e at nau chi custa at a essi una Paschixedda nodida.

de Boxis