Appetitosamente 2016. Fèstival Regionale de su màndigu.

Fine de chida de importu pro su màndigu in Sardigna cun su Fèstival Appetitosamente 2016. Addòbiu in sa bidda de Siddi

Fèstival Appetitosamente 2016

At a cumintzare pusticràs in sa bidda de Siddi, in su coro de sa Marmidda, su Fèstival Regionale Appetitosamente 2016. Su Fèstival, nàschidu in su 2006 gràtzias a sa voluntade de sa Comuna de Siddi, sa Cooperativa Villa Silli, sa Pro Loco de Siddi e su sòtziu Slow Food de Aristanis, ocannu pertocat su tema de su biàgiu a s’iscoberta de su màndigu, su biàgiu comente un’esperièntzia chi serbit pro connòschere àtera gente, àteras culturas, àteras caras de su mundu de s’enogastronomia. Unu biàgiu chi interessat puru sa mente e si movet peri sonos, fragos, gustos, emotziones e ammentos.

Apettitisomente 2016 at a durare fintzas a domìniga 28, cun unu programma ricu de atividades chi ant a animare is carreras de sa bidda e non petzi. Pro su chi pertocat sa mùsica, b’at a èssere unu cuntzertu de Anna Tifu e Julien Quentin in sa Tumba de is Gigantes de sa Domu de s’Orcu. E àtera mùsica cun sa bossa-nova de Silvia Piras, cun Giuseppe Baldino e Nicola Cossu, su sonetu de Antonello Salis e su rock de is Lazybones Flame Kids.

S’at a pòdere papare in is mesas aparitzadas in su tzentru de sa bidda e tastare is màndigos e is binos chi faeddant de identidade locale. B’at a èssere una mustra mercadu pro is artesanos e is produtores sardos. S’at a pòdere leare parte a laboratòrios pro connòschere mègius s’arte de su turrone, sa traditzione de sa madrighe o fermentu, s’istòria de sa garnatza, sa coltivatzione de su melone chena de abba.

A intro de Appetitosamente 2016 importu mannu at a tènnere, a is chimbe e mesu de su 28, s’addòbiu “Le Cucine di Babele” in sa lolla de “Casa Steri”, Museu de is Traditziones agru-alimentares de Siddi. S’argumentu at a èssere sa coja intre de biàgiu e màndigu pro ite ca oe biagiare bolet nàrrere a s’acostare a una cultura diferente e puru tastare, gustare, assaborare cosas noas.

Si nd’at a chistionare cun s’olandesu Reinier van Kelij, unu de is babbos de s’Internet sardu e espertu de coghina, cun s’architetu sardu Stefano Soi chi est torradu in Sardigna pustis de traballos e esperièntzias foras e chi immoe est un’imprendidore de binu, e cun Sabine Hämmerle, chi dae s’Isvìtzera est bènnida in Sardigna e dae pagu tempus at abertu un’atividade de ristoratzione in s’ìsula de Santu Antiogu. At a coordinare s’addòbiu Alessandra Guigoni, antropòloga culturale e blogger giai famada pro s’impignu chi nche ponet a favore de sa promotzione de su màndigu, de s’isvilupu rurale e de is patrimònios agru-alimentares de sa Sardigna. Unu fine de chida cussu de Appetitosamente 2016 chi promitet unu biàgiu sintzeru de sa Sardigna a intro de sa Sardigna.

de Manuela Ennas