Sa de duas die de Reinas in su Salone Internatzionale de Torino

Oe sa segunda die de Reinas in su Salone de su libru de Torino

Reinas de Sardigna

A pustis de sa resèssida de eris s’est aberta oe sa segunda die de Reinas in su Salone de su libru de Torino. Is traballos ddos ant abertos a pustis de sa vìsita de is dischentes de totu is iscolas de Itàlia chi oe sunt is ospites prus de importu de su Salone. Pipios atentos e prenos de curiosidade pro is libros e pro totu is fainas aparitzadas dae is esposidores.

Su primu addòbiu de custu mangianu at pertocadu sa situatzione de povertade chi est bivende sa Sardigna, cun unu meledu a pitzu de ideas e istratègias pro chircare de barigare is dificultades chi sunt ponende in crughe sa sotziedade sarda in custos ùrtimos annos.

A s’addòbiu, aparitzadu paris cun sa Fondatzione Emanuela Zancan onlus, at leadu parte Elena Innocenti puru. Preguntas dae su pùblicu mescamente pro su chi pertocat is polìticas de is mamas traballadoras.

Su segundu addòbiu imbetzes fiat a pitzu de Giorgio Asproni, un’òmine de gabbale e de importu pro totu s’istòria de su Risorgimentu Italianu. Sa domo de imprenta Poliedro at presentadu su libru ” Giorgio Asproni. Nel nome della rivoluzione”, unu traballu portadu a dae in antis de su professore Giuseppe Puligheddu paris cun is istudiantes de su Liceu Asproni de Nùgoro dae asumancu deghe annos. Difatis in pare a su professore bi fiant duas istudiantes, Carlotta e Valentina, chi as contadu comente siat istadu de importu pro issas a leare parte a unu progetu che a custu chi portat s’istòria a intro de s’iscola e portat is giòvanos a resonare e a fraigare unu sentidu pròpiu di identidade pro more de una didàtica diferente chi càstiat puru a is logos e a is relatas cun su restu de su mundu. Su pùblicu at sighidu puru unu vìdeu cun su contu de sa vida de Asproni e de comente est istadu aparitzadu su progetu.

de Manuela Ennas