Reinas de Sardigna in su de 30 Salones Internatzionales de su Libru de Torino

Dae su 18 a su 22 de maju ddoe est sa Sardigna puru in su programma de su de 30 Salones Internatzionales de su libru de Torino cun su tema Reinas.

Reinas de Sardigna

Est cun is Reinas chi ocannu sa Sardigna leat parte a su Salone Internatzionale de su Libru de Torino. S’AES, su sòtziu de is editores sardos, paris cun sa Regione Sardigna, at a presentare unu programma de addòbios chi pertocant mescamente is Reinas sardas, fèminas de gabbale chi ant lassadu unu signu de importu in sa cultura e in s’istòria sardas.

Comente at naradu in sa Cunferèntzia de imprenta de giòbia passadu sa presidente de s’AES Simonetta Castia, Reinas bolet èssere unu donu a fèminas chi ant ischidu rapresentare e contare s’identidade prus funguda de sa Sardigna, barighende is làcanas de s’èssere ìsula e divenende fintzas unu modellu de fortza e innovatzione. Sunt sa bellesa de 31 is domos de imprenta sardas chi portant in sa fiera de su Lingotto de Torino is libros issoro e una bella pariga de addòbios pro fàghere connòschere totu is novas de su mundu editoriale sardu.

Reinas sunt is fèminas chi s’agatant in is pàginas de is romanzos, ma Reinas sunt puru fèminas beras chi ant gherradu, chi ant donadu boghe a sa Sardigna, chi ant agiudadu a iscrìere sa sotziedade chi semus bivende oe.

Cussu de s’editoria est unu setore chi meresset atentu e sa Regione Sardigna sighit custa àndala de acanta, ponende ocannu puru sa bellesa de chentu mìgia èuros pro sustènnere s’AES e intzentivare is editores sardos. Difatis puru s’assessore regionale a sa cultura Giuseppe Dessena est in su Salone in custa dies pro pigare parte a is fainas a dimustratzione de s’impignu de sa RAS in custu sentidu. “Ocannu – at naradu s’assessore Dessena – mi praghet meda su tema, chi ponet in pare is Reinas nostras, fèminas prena de lughe chi ant donadu meda a sa Sardigna, cun su tema prus mannu seberadu dae su Salone “Oltre il Confine”, “In prus de sa làcana”. Est un’argumentu chi nos tocat de acanta, siat pro sa chistione acapiada a is migrantes chi semus bivende cun atentu mannu puru in Sardigna siat pro ite ca is Reinas nostras sunt un’esèmpiu de comente si potzat andare in prus de sa làcana cun sa cultura, cun sa poesia, cun sa sabidoria o puru cun sa semplitzidade de sa vida issoro”.

In su programma leghimus nùmenes comente su de Maria Giacobbe, e addòbios in ammentu de Grazia Deledda, Nereide Rudas, Maria Lai. E ancora is primas fèminas chi sunt istadas sìndigas de Itàlia Ninetta Arru Bartoli de Boruta e Margherita Sanna de Orune, e ancora Bastianina Musu Martini, Marianna Bussalai e Nadia Spano. De importu puru is figuras de òmines comente sa de Giorgio Asproni e de Giuseppe Dessì. Nch’est logu puru pro àteros argumentos comente cussu de is perìgulos de sa povertade in Sardigna e puru cussu de sa violèntzia de gènere.

De Manuela Ennas