Universidadi de Casteddu. Publicau su bandu Erasmus+

In su bandu Erasmus 1350 postus disponibilis. Un’oportunidadi manna po is studentis sardus.

Su bandu Erasmus

Funt 1350 is postus disponibilis de su bandu Erasmus+, publicau de s’Universidadi de Casteddu. Is studentis ant a podi fai unu perìodu de stùdiu in un’universidadi europea stràngia. Is stadus innui ant a podi preguntai de andai funt 12, poita ca s’Erasmus s’at a podi fai in is universidadis chi ant firmau un’acòrdiu cun Casteddu.

Cun su progetu Erasmus is studentis ant a podi abarrai foras de sa Sardìnnnia po ses mesis o po un’annu, po sighiri is cursus de stùdiu e donai is esàminis. Est possìbili puru andai foras sceti po apariciai sa tesi de làurea, si is studentis ant giai donau totus is esamìnis, o si podit fai unu perìodu de stùdiu e imparu.

In sa domanda is candidaus ant a podi inditai finas a seti universidadis, precisendi s’òrdini de preferèntzia. Po leai parti a Erasmus is candidaus depint connosci beni sa lìngua impreada in s’Universidadi chi ddus at a arriciri. Si no, depint connosci asumancu s’ingresu. Sa permanèntzia at a podi durai de tres a doxi mesis. Gràtzias a is finantziamentus de sa Comunidadi Europea, de su Ministeru de s’Universidadi e de sa Regioni funt prevìdidas 600 bursas de stùdiu de 500 èuros, po no prus de ses mesis.

Is domandas, chi ant a depi essi fatas po mori de sa retza in su giàssu http://webstudenti.unica.it, podint essi presentadas de martis 23 de friàrgiu finas a su 15 de martzu. Finas a su 15 de martzu, po informai is studentis apitzus de s’Erasmus, dònnia facultadi at a apariciai atòbius.

Is profetus de fai unu perìodu in un’Universidadi stràngia funt medas. Po primu cosa is studentis ant a imparai a studiai e traballai in lìnguas diferentis, pruschetotu in ingresu. Custa cosa est de importu mannu po su benidori. Un’àtera cosa de importu est chi is studentis ant a imparai a traballai in un’ambienti multiculturali, poita ca ant a depi studiai in trumas de traballu fatas de studentis de natzionalidadis diferentis. Su perìodu passau foras podit ingendrai finas retzas de connoscèntzias chi ant a podi serbiri una dii in su mundu de su traballu.

de Massimiliano Meloni