Is Giogus Olìmpicus, cussu chi parint e cussu chi funt diaderus.

Sa realidadi soventi est atesu meda de is valoris de is Giogus Olìmpicus

Is valoris dei is Giogus Olìmpicus

Is Giogus Olìmpicus firmant is gherras.

Is Giogus Olìmpicus modernus nascint in su 1896, bòfius de su baroni frantzesu Pierre de Coubertin. S’idea sua fiat de fai, in is tempus modernus, is giogus sportivus de sa Grècia antiga cun sa matessi filosofia. Dònnia cuàturu annus su sport iat a ai dèpiu arremudai totus is àteras maneras de arresolvi is problemas intra de is pòpulus de su mundu. Sa cosa pustis est andada in manera diferenti. Ca a fai citì is fusilis no est cosa fàtzili.

Sa cosa de importu est a liai parti, no a binci.

A totus praxit pensai a fèminas e òminis chi giogant po spàssiu, e chi no bincint passièntzia. Ma sa passièntzia no est cosa fàtzili de agatai in is personas. Ca binci est sa cosa prus de importu, a sa faci de De Coubertin. Una bìncida podit trasmudai una vida. E insaras, chi serbit calincuna cosa po agiudai, mancai una mexina, poita no dda pigai? E nosu, sciadaus, a si spantai…

Su sport est una cosa, sa polìtica un’àtera.

Apariciai is Giogus Olimpicus no est cosa de dònnia dì. Serbit dinai meda, nci funt de fraigai is struturas po is sport diferentis, nc’est de pensai a s’arricida de is atletas e de is spetadoris. Is Giogus bolint nai unu muntoni de dinai de spendi. Chi fait su tziri-tziri. Soventi su dinai chi si spendit est meda de prus de cussu chi si prebidiat de spendi. Ma tanti chi spendit no est agiumai cussu chi pagat. Is Giogus de su 2004 funt stètius salius meda po sa Grècia, chi no s’est ancora stantarxiada.

Po praxeri sport, no giogu de palloni.

Chi no si firmat sa gherra, asumancu dònnia cuàturu annus parit chi si firmit su giogu de su palloni. Po unu mesi sa televisioni e is giornalis chistionant finalmenti de is àterus sport. Sa sèrie A, sa Champion e totu cussu chi pertocat su palloni parit scarèsciu. Sa genti diventat esperta de judo, beach volley, nàdidu. Ma su palloni est inguni, lestru a torrai a bessiri a pillu.

de Massimiliano Meloni