“Sardegna a canestro”

S'Itàlia de Ettore Messina binchet a Casteddu contra a sa Turchia.

Itàlia basket

S’Itàlia s’agiùdicat aici su torneu “Sardegna a canestro”. S’addòbiu de Domìnigu 13 de Austu in su PalaPirastu de Casteddu contra a sa Turchia agabbat 73-53 a favore de is asulos, ghiados dae Datome (17 puntos) e Belinelli (14).

Un’Itàlia chi at cumbintu de a veras! A sa primu ocasione de importu in s’àndala pro is Europeos, is asulos propassant a sa Turchia pro 73-53, binchende su Torneu “Sardegna a Canestro” 2017. Sa bìnchida de su trofeu est segundària, gasi comente su resurtadu: su chi at ispantadu su pùblicu pruschetotu est istada sa prestatzione in campu de s’iscuadra de Ettore Messina, cuntzentrada e atentzionada fintzas in is cosas piticas. Mescamente in defensa, aici su giogu est istadu prus simple fintzas in atacu.

Dae luego etotu si cumprendet chi est totu un’àtera Itàlia: is asulos sunt gherradores e frimmos in defensa, mentras in atacu nche colant in unu nudda. Belinelli est iscadenadu, Melli donat energia e agiudu in defensa e Datome faghet una tripla avatu de s’àtera.

Messina cuntzedet ispàtziu a totus is giogadores ma sighit a èssere sa defensa a fàghere sa diferèntzia; una calidade e un’atentu difensivos totu annoados: curreras, agiudos, bòcias difìtziles e recùperos assortados .

In sa segunda parte de su giogu sunt is turcos a tènnere sa mègius. In su de tres tempus nde faghent sete de triplas, duas batint sa firma de Muhammed. Ma sa partida est indiritzada bene: is asulos non trigant a respùndere e nche lompent a s’agabbu cun 20 puntos de distàntzia.

Prestatzione chi lassat su pùblicu cuntentu e prenu de ispera. S’Itàlia cun impignu, passione e sacrifìtziu at tentu una defensa comente pagu bortas. Messina a pustis de sa partida at acraridu a is micròfonos de tènnere is ideas bastante craras pro su chi pertocat is giogadores de batire a is Europeos. Sa duda est pro su chi atenet si tènnere tres playmaker o puru una guàrdia in prus. Amus a bìdere sena de si gloriare pro sa prestatzione nòdida de Casteddu ca su tretu cara a s’Europeu est ancora longu!

de Manuela Ennas