Is spèndulas de Biddexidru

Biddexidru est famada meda po unas cantu cosas: po sa naturalesa cosa sua e po duus grandus òminis de cùltura, Giusepi Dessì e Salvator Angelo Spano

Sa spèndula de Biddexidru

Chini lompit po sa primu borta in Biddexidru sa primu cosa chi fait est bisitai sa bidda e apustis is montis chi ddoi funt aingìriu. Sa naturalesa oferrit logus arestis, pruschetotu padentis de ìlixi e is spèndulas famadas. Benendi de Casteddu tocat a pigai s’arruga de su Stadu 130 po Dèximu e apustis sa 196 po Biddexidru. Una borta chi seus intraus a bidda abastat a sighiri is inditus po Cantina Ferraris aundi eus a lassai is veturas aparcadas.

Una borta chi seus lòmpius in su padenti agataus unas cantu àndalas sinnaladas in biancu-arrùbiu: s’àndala 109 (Cantina Ferraris – Spèndula de Muru Mannu), s’àndala 110 (Cantina Ferraris – Genna s’Ega Manna), sa 111 (Cantina Ferraris – Punta Magusu cun artziada alpinìstica), sa 112 (Canali Filareddus – Cuili Linas), sa 113 (Piscina Irgas – Oridda). S’àndala 109 est a su costau de s’arriu Cannisoni e lòmpit finsas a sa prus arta spèndula de Monti Muru Mannu (942 mt). Innoi, anca nci at àcua meda, nd’agataus assumancus tres de spèndulas: sa prus arta est de 70 mt. Sighendi a andai ainnantis, ma fora de s’àndala sinnalada, fait a arribai a sa spèndula arta de s’arriu Linas (50 mt). Tocat a abarrai atentus ca is arrocas, po mori de s’àcua, funt meda alliscinosas (in s’interis s’àndala est sèmpiri prus strinta).

Un’àteru logu chi merescit de essi bisitau est sa spèndula de Piscina Irgas. Tocat a pigai s’àndala sinnalada nr 113 chi artziat finsas a sa sedda de Cùcuru Sa Bagadiedda e Punta Piscina Irgas (su logu in sa mapa est arremonau cun su nòmini «Is Concas de Piscinas Irgas») po ndi calai in s’arriu Oridda faci a sa spèndula matessi (45 mt).

Su logu est stravanau ma perigulosu meda po is arrocas alliscinosas (donai duncas atentzioni meda). Un’àtera spèndula famada est sa de s’arriu Coxinas connota che a Sa spèndula de Biddexidru ca dda agataus acanta de sa bidda: est arta 25 mt. Is àndalas arremonadas in custu artìculu funt aìnturu de su padenti de Monti Mannu. Custu padenti est famau meda ca ndi chistionàt Giusepi Dessì su scridori. Dessì nàsciu in Casteddu su 7 de Austu de su 1909 ma cun arrexinis fungudas in Biddexidru fiat unu scridori famau ca in su 1972 at bintu su «Prèmiu Strega» cun s’arromanzu «Paese d’ombre» (scritu in Italianu). Dessì fiat fillu de Francesco Dessì Fulgheri e de Maria Cristina Pinna. Cun s’arromanzu suu nd’est bessiu aici famau ca Ginafranco Contini su crìticu literàriu ddu iat nomigiau su «Proust sardu».
In Paese d’ombre Dessì chistionat de Biddexidru e de sa vida de Angelo Uras unu massaju chi a mannu ndi bessit sìndigu de sa bidda matessi intra sa segunda metadi de su sèculu XIX e sa Primu Gherra Mundiali (1914-1918). Uras est duncas su chi arrennescit a sarbai su padenti de ìlixi de Monti Mannu ca depiat essi totu smatau po ndi fai craboni e linna po is ferrovias e is minas, po nexi de sa lei piemontesa de su 1820. Finsas su poeta macumeresu Malchiorre Murenu iat fatu una poesia apitzus de sa lei de su 1820: «Tancas serradas a muru, fatas a s’aferra-aferra, si su chelu fit in terra, si lu aiant serradu puru».

In custu lìburu funt arremonaus is logus chi apu inditau apitzus (Monti Mannu, su padenti de ìlixi, s’arriu Leni, s’arriu Fluminera e su sciacuadòrgiu de sa bidda acanta de sa pratza, sa baddi de Magusu, sa cresiedda de Santu Sisinni cun is matas de olia e aici nendi).

Addolumannu Dessì, mortu in Roma in su 1977, no at scritu nudda in Sardu ca in domu ddi chistionànt in Italianu e Frantzesu, perou Dessì arreconnosciat su fatu chi su Sardu fessit una lìngua a parti, filla de su Latinu.
Biddexidru est famada puru po Salvator Angelo Spano polìticu e Presidenti de sa Regioni Sardìnnia in sa segunda metadi de su sèculu XX. Spano at scritu in Lìngua Sarda contus («Su Maucheddu»), poesias («Sa vida de Gesu Cristu a sa manera nosta» e «Perda ‘e sali») e finsas cumèdias («Est torrau Licu»; «Su parenti americanu»; «S’arropapaneri»; «Sa butega de Tzia Cadania» e «Ogu liau»). Cun Spano Biddexidru est intrada in sa stòria de sa literadura in Lìngua Sarda (a nai sa beridadi fiat cidresu finsas Nàssiu Cogotti chi at scritu in Sardu ma pruschetotu asuba de Casteddu). Spano, in su contu de «Su Maucheddu» (1982), contat sa stòria de unu crabàrgiu maurreddinu me in is montis de Biddexidru anca est arremonada sa Punta Magusu (unu de is prus logus bellus de Biddexidru), custu crabàrgiu a s’acabu detzidit de lassai is crabas e de fai àterus traballus po circai de amellorai sa vida cosa sua. A s’acabu est mortu traballendi in d-una mina. Cun custu contu Spano at bintu su primu prèmiu in su de XXVI cuncursus de su Prèmiu Otieri. E apustis ddu agataus in s’arregorta de «Contus de bidda mia» (imprenta de su 1995). Aici at scritu Frantziscu Màsala in sa presentada de s’arregorta: “…un intenso racconto intitolato a “Su maucheddu” […]: è la dolorosa storia di un pastorello maurreddu che decide di abbandonare le capre per cercare altri modi di campare la vita, via via facendo il giornaliere, lo zappatore, il mietitore, il bacchiatore di mandorle e di olive, lo spaccapietre e, infine, il minatore. La dolorosa vita di Maucheddu termina saltando in aria su di una mina licenziato per decesso (un personaggio, tra parentesi, che sembra essere il simbolo di una catastrofe antropologica, cioè della morte, in Sardegna, dell’antica civiltà contadina, sconvolta, travolta, annientata dalla nuova civiltà industriale). Ma la cifra stilistica più propria di Salvator Angelo Spano non è il patimento o la denuncia, ma l’ironia o il sarcasmo e, precisamente, quello che sembra essere il segno specifico della letteratura campidanese: la farsa, cioè lo stravolgimento scenico, tragicomico, del personaggio paesano, naïf, secondo il quale niente c’è di drammatico nella vita su cui non ci si possa fare una risata agrodolce.”
Punta Magusu (1023 mt), de no cunfundi cun Cùcuru Magusu, est unu logu bellu meda e comenti apu giai scritu apitzus su tretu po ddoi lompi est alpinìsticu. Duncas, eus biu ca su logu est stravanau e donat sa possibiladi de artziai a monti cun passilladas e artziadas de importu mannu. Puru is montis de Biddexidru iant a depi essi parti de su Parcu Naturali Regionali de Monti Linas aici comenti s’agatat scritu in sa lei regionali nr 31 de su 1989. In s’interis su EFS («Ente Foreste Sardegna») at torrau a introdusi su cerbu sardu (cervus elaphus corsicanus) e su muvroni (ovis musimon) ca fiant sparèssius de custu padenti in sa segunda metadi de su sèculu XX.

de Massimo Madrigale