Cazz Boh! su mundu de sos Nasodoble

Su grupu musicale tataresu Nasodoble est resurtadu primu in su Cuncursu “Musica contro le mafie”

Su mundu de sos Nasodoble

Nasodoble est unu grupu musicale tataresu chi at tentu visibilidade manna gràtzias a una cantzone particulare meda cramada “cazz boh?” Una cumpositzione assimigiante a sa forma blues (call and response) cun unu testu polèmicu e befulanu contra a sa sotziedade, mescamente a cussa sarda.

Nasodoble pagas dies a oe est resurtada prima in su Cuncursu “Musica contro le mafie”, a segus de votatziones fatas in sa retza.

Amus atopadu Alessandro Carta in arte Nicola di Banari, boghe e autore de is testos de su grupu.

Salude Alessandro prima de totus, it’est “Musica contro le mafie”?

“Musica contro le mafie” est unu prèmiu italianu de importu mannu, dedicadu a sas cantzones tziviles chi ant pro tema sa màfia. Nois b’amus partetzipadu e “Cazz Boh”, pro como, est andende bene ca semus arribados primos in sa votatzione de sa retza. A sighire b’ant a èssere àteras duas votatziones, una de sa “Giuria Studentesca” e s’àtera de sa “Giuria Responsabile”. Chie binchet at a sonare a Casa Sanremo in sas dies de su Fèstival.

It’est acadèssidu cun sa cantzone “cazz boh?” Proite at ispantadu gasi meda gente?

Chi apat ispantadu gente non l’isco. M’est pàrsidu chi siat pràghida sa veridade ballerina chi movet. Unu pagu de saudade a sa sarda.Pranghende riende e ballende.

Bellu “sa veridade ballerina”! Ma comente t’est bènnida a conca s’idea? Chirco de acrarire mègius sa pregunta, m’apo immaginadu a tie unu merie solu in domo tua, meledende a pitzu de custu mundu malàidu. Una chiterra e sa gana de leare a malas paràulas sa gente o forsis a los chèrrere mòvere dae su sonnu. Est gasi o est acadèssidu àteru?

Boh?! Comente a semper cando mi pòngio a chiterra in manu chirco de fàghere sìntesi de ideas chi mi girant a conca. In prus fia istracu meda e s’istrachesa a bortas faghet a sa sola. Non b’at istadu nudda de ispetziale.

Che a totus sas cosas galanas. Comente naschent sas ideas de sas cantzones. Iscries tue solu o b’at chie agiuat?

Eh! Issos mi prendent a sa cadrea e mi lassant petzi sas manos lìberas e incomintzant a m’iscùdere a fuste tzichirriende “Iscrie! Su santu chi t’at fatu!”

Ahahahah, ma bae!

A banda sas brullas iscrio deo etotu e impare las bestimus. Ma non b’at règula.

Partit totu dae s’iscritu?

Emmo. Dae su carraju chi bato deo, a pustis bi traballamus in pare, finas a arribare a unu … carraju chilivradu. Beru est chi mi so ispassiende.

E si cumprendet. Amus bidu unu vìdeu bostru cun cussu mito chi si narat Patrizio Fariselli. (Dall’altra parte del cancello, cover de Giorgio Gaber). Comente l’ais connotu?

Simone Sassu (su tastierista de su grupu) aiat organizadu in Montevecchio Music Circus de John Cage, e l’at invitadu a intervènnere cun unu laboratòriu. In cue nos semus connòschidos bene ca semus restados in ie chimbe dies. Grandu òmine e musitzista. Fintzas a sa die chi l’apo connotu, si m’aiant preguntadu si a bisu meu Fariselli èsseret esistidu, l’aiat rispostu de nono, pro cantu fiat in su mitu pro a mie. (Patrizio Fariselli est istadu su tastierista de su legendàriu grupu “Area” ghiadu dae su maistru de sa boghe, su biadu, Demetrio Stratos. NdA)

Bene meda. Apo un’àtera pariga de preguntas. Nasodoble ite sonant? Est unu rock d’autore “sotziale”? “Polìticu”?

Nasodoble sonat cantzones. Un’ograda a su sound chi siat groove-tzentricu e una a sa poesia. Chircamus de tratare totu sos gèneres musicales possìbiles, nos praghet gasi, e gasi bestimus sas cantzones seberende su gènere chi li simìgiat. Sas cantzones sunt cantzones de amore, in custu sentidu sunt cantzones polìticas et tziviles. Fintzas Cazz boh, a bisu meu, est una cantzone de amore.

Sonare in Sardigna est unu problema o un’oportunidade?

Est unu problema mannu. Est un’ispesa dae luego e in prus in Sardigna mancant sas professionalidades de sa filiera. No b’at nudda inoghe e tocat de s’imbentare s’indùstria musicale, màssimu etotu como chi su mercadu nch’est rutu in disaura. S’oportunidade non resesso a la bìdere pro como.

Nasodoble in su benidore?

Su benidore de Nasodoble est in su traballu. Sighire a fàghere sa mùsica chi nos praghet in una manera semper prus professionale. Isco chi est cosa chi faghet a rìere pro s’ingenuidade ma a mie mi praghet meda a èssere sàbiu chena sentidu. Tantu est pro bistare mègius.

E tando gràtzias a Alessandro e Nasodoble. Gràtzias duas bortas ca s’intervista l’amus inghitzada brulla brulla in sardu e gasi nche l’amus agabbada. A àteros annos.

de Martino Faedda