It’est sutzèdiu cida passada. De su 10 a su 16 de ledàmini 2016

Su resumu de is novas prus de importu de cida passada po is giornalis

pindulas-10-16-de-ledamini-2016
  • Est mortu Dario Fo. Su prèmiu Nobel po sa literadura in su 1997 teniat 90 annus. Ddu prangit su mundu de sa cultura. In is ùrtimus annus Fo, pustis una vida de ativista de manca, si fiat acostau a su Movimentu 5 Steddus.
  • Sa dì de sa morti de Dario Fo, prèmiu Nobel po sa literadura in su 1997, s’Acadèmia svedesi de su Nobel at donau su matessi prèmiu a Bob Dylan, su cantautori famau americanu. Is arrexonis de is giugis funt chi issu “at ingendrau espressionis poèticas novas aìnturu de sa traditzioni manna de sa cantzoni americana”. Apitzus de custu sceberu nc’est stètia calincuna polèmica de su mundu de sa literadura “uficiali”.
  • Nd’ant chistionau totu is medias italianus: in sa lei noa po sa semplificatzioni amministrativa aprovada de su Consillu regionali de sa Sardìnnia nc’est un’artìculu chi prebidit chi is tìtulus e is càrrigas siant a su feminili candu pertocant is fèminas. Duncas, de immoi a innantis, eus a biri scritu in is documentus regionalis fueddus italianus comenti “assessora”, “prefetta”, “commissaria”. Sa proposta de lei est de sa consillera regionali Annamaria Busia de su partidu de su Centru Democràticu. S’italianu benit agoa de su sardu, ca in sa lìngua sarda custa no est una novidadi, e fueddus comenti assessora, sìndaga, consillera funt impreaus normalmenti.
  • Su velista sardu Gaetano Mura est partiu de Casteddu po fai , a solu, su giru de su mundu in barca a vela. Sa mira est cussa de melliorai su record de su cinesu Guo Chuan, chi in su 2013 dd’at fatu in137 diis.
  • In su Partidu Democràticu no ddoi est paxi. Crescit sa scuntentesa de sa minoria interna. Bersani narat chi no nci dd’ant a bogai de su Partidu, chi est domu sua, ma sighit a nai chi at a votai no a su referendum e criticat puru sa lei de stabilidadi.
  • Massimo d’Alema sighit sa gherra contra a Renzi po su no a su referendum. In un’atòbiu apariciau cun Quagliarella at postu impari genti de dereta e de manca: Fini, Gasparri, De Mita, Pomicino, Civati, Dini, totus a nai no a s’arreforma costitutzionali.
  • Presidentzialis USA: dònnia dì bessit a pillu una stòria noa de molèstias sessualis de parti de Donald Trump. Hillary Clinton est sèmpiri prus forti in is sondàgius.
  • S’Amèrica acusat sa Rùssia de atacus informàticus contra a su sistèma eletorali po favoressi Trump contra a Clinton. Obama ameletzat de autorizai unu cyber atacu de is Stadus Unius contra a sa Rùssia. Putin narat chi sa Rùssia est notzenti e avertit de fai atentzioni, chi un’atacu informàticu americanu iat a tenni cunseguèntzias gravis.
  • No nc’est paxi po Aleppo. Sa citadi siriana est su sìmbulu de sa gherra tzivili. Su regimi de Assad e is Russus sighint a bombardai sa parti est de sa citadi. A nudda serbint is tentativus de sa diplomatzia internatzionali po ponni fini a custu degòlliu.

de Massimiliano Meloni