It’est sutzèdiu cida passada. De su 13 a su 19 de làmpadas 2016

Su resumu de is novas prus de importu de cida passada po is giornalis

Pìndulas. 12 - 19 de làmpadas 2016
  • Europeus de palloni. Sa natzionali italiana de Antonio Conte, pustis de ai bintu cun su Bèlgiu, at bintu puru sa segunda partida cun sa Svètzia de Ibrahimovic e at giai passau su primu turnu.
  • Sa politzia de su Bèlgiu at firmau doxi fundamentalistas islàmicus chi boliant fai un’atentau terrorìsticu in Bruxelles in su mentris chi giogàt sa natzionali in is europeus. Boliant ferri is tifosus chi castiànt sa partida in is maxi schermus postus in is pratzas de sa tzitadi.
  • In su Rènniu Uniu est stètia bocida sa parlamentari laburista Jo Cox, impenniada a favori de is disterraus sirianus e contra a sa Brexit. Su bocidori,firmau luegu, est unu tzitadinu britànnicu biancu de 52 annus, macu, chi in su mentris de sa bocidura tzerriàt “Britain first”.
  • Referendum Brexit. Crescit sa tensioni po su votu de cida chi benit. Cussus chi funt a favori de sa bessida de su Rènniu Uniu de s’Europa parriant de prus de cussus contràrius, ma s’emotzioni po sa bocidura de sa parlamentari laburista Jo Cox at fatu andai innantis in is sondàgius cussus chi bolint abarrai in s’Unioni.
  • Cida de scòntrius eletoralis apitzus de is ballotàgius. Su giornali “Fatto quotidiano” at scoviau chi sa candidada de su Movimentu Cincu Steddus a sìndigu de Roma no at decrarau de ai tentu un’incàrrrigu de sa ASL de Civitavècchia in is annus passaus candu fiat consillera comunali in Campidòglio. Po su PD est cosa de dda spricullitai sa Giustìtzia.
  • Ballotàgius. Po su giornali “La Repubblica”, Massimo D’Alema est a favori de is Cincu Steddus, ca chi issus bìncint e su PD perdit, iat a essi prus fàtzili a nci bogai a Renzi. Parrit chi D’Alema apat nau de essi a favori de totus cussus chi funt contra a Renzi, ma issu at decrarau de no ai agiumai nau custas cosas. Ma is giornalistas narant de essi segurus chi D’Alema at fatu diaderus custus arrexonus cun amigus e collaboradoris.
  • Sardìnnia. Sa Asl ùnica po totu sa regioni depiat partiri su primu de argiolas, ma sa majoria de centru manca in regioni no at ancora agatau un’acòrdiu. Prus de unu consilleri, mancai nerat de no essi contra, preguntat de arribai a custa detzisioni in una manera diferenti de cussa portada innantis de sa Giunta Pigliaru. In dònnia manera, fàtzili chi a custu puntu su primu de argiolas no s’at a fai nudda e is cumissàrius de is ASL ant a essi prorogaus.

Boxis