It’est sutzèdiu cida passada. De su 15 a su 21 de friàrgiu

Su resumu de is novas prus de importu de cida passada po is giornalis

Pìndulas. 15-21 de friàrgiu
  • Nòminas noas in sa Rai. Su Diretori Generali Antonio Campo Dall’Orto at nominau is diretoris nous de is tres canalis: funt Andrea Fabiano – Rai1, Ilaria Dellatala – Rai2 e Daria Bignardi – Rai3. Calincuna polèmica, pruschetotu po su nòmini de Daria Bignardi, chi parit essi amiga de Renzi.
  • Su mundu de sa Cultura prangit Umberto Eco, mortu in Roma a s’edadi de 84 annus. Connotu de totus po is arrenèscidas literàrias suas, comenti Il nome della rosa, fiat pruschetotu filòsofu e semiòlogu.
  • Su regista Gianfranco Rosi at bintu su Fèstival de su Tzìnema de Berlino cun su film-documentàriu Fuocammare, una paristòria apitzus de is disterraus. Su regista, candu at ritirau su prèmiu, at nau chi su pentzamentu suu andat a is disterraus chi no funt arrenèscius a arribai a Lampedusa.
  • Mancai Rùssia e Stadus Unius apant nuntziau un’acòrdiu po firmai is batallas, in Sìria si sighit a cumbati. Unus cantu bombardamentus ant centrau scolas e spidalis faendi 50 mortus tzivilis. Donniunu donat sa curpa a is àterus.
  • Is Stadus Unius ant bombardau in Lìbia unu campu de imparu de s’Isis. Po su New York Times s’obietivu fiat unu terrorista tunisinu acapiau a is atentaus de su 2015 in Tunisia, in su Museu de su Bardo in Tunisi e in Sousse.
  • Su Fondo Monetario Internazionale (Fmi) at nau eja a unu segundu mandau de sa Presidenti Christine Lagarde. Su segundu mandau at a inghitzai in su mesi de argiolas chi benit.
  • Su Ceo de Apple Tim Cook at nau no a s’ordini de unu giugi de sa Califòrnia chi bolit chi Apple dongat totu s’agiudu netzessàriu po liai informatzionis de s’IPhone de unu de is atentadoris de sa stragi de S. Bernardino. Totu sa Silicon Valley defendit sa sciobera de Tim Cook, poita ca sa cosa iat a essi perigulosa po sa seguresa de is ainas tecnològicas.
  • Segundu AlYoum, unu giornali egitzianu pro-guvernu, Giulio Regeni iat a essi stètiu bociu de sa cunfraria de is Fradis Musulmanus, aremigus de su guvernu, po ponni s’Egitu in dificultadi faci a sa comunidadi internatzionali.
  • Est prontu unu progetu de sanamentu e crèscida po Meridiana po mori de sa creatzioni de una sotziedadi noa cun Qatar Airways. Qatar Aiways iat a depi tenni su 49% de sa sotziedadi e s’Aga Khan su 51%, est a nai sa majoria. Su problema est chi po fai custa operatzioni iat a tocai a licentziai 900 personas.
  • Indagaus 14 operadoris e su diretori de su centru Aias de Deximumannu. Funt incurpaus de ai atripau is malàdius. Scoramentu in totu su mundu de sa sanidadi.
  • Su pòpulu de sa Meurreddia at protestau in Casteddu, faci a su Consillu regionali, po preguntai traballu po sa prus provìntzia pòbera de s’Itàlia. S’atòbiu est stètiu apariciau de Cisl, Movimentu de is partidas IVA, studentis, artesanus, negotziantis, Movimentu po sa Zona Franca.

de Massimiliano Meloni