It’est sutzèdiu cida passada. De su 16 a su 22 de ledàmini 2017

Su resumu de is novas prus de importu de cida passada po is giornalis

Pìndulas. 16 - 22 de ledàmini 2017
  • Po su leader de su M5s Di Maio serbint is osservadoris internatzionalis de s’Osce po is eletzionis in Sicìlia:  timit chi nc’iat a podi essi su fenòmenu de su votu de scàmbiu.
  • Martis passau est partiu de Roma su trenu de su PD “Destinazione Italia”. Su segretàriu Matteo Renzi me is duus mesis chi benint at a andai a ingìriu in unu “viàgiu in trenu po ascurtai s’Itàlia e is italianus”.
  • Su PD at presentau una motzioni parlamentari contra a su governadori de sa Banca d’Itàlia Ignazio Visco. Sa motzioni dd’at bòfia Renzi, ca no ddu bolit cunfirmai in sa càrriga. Su guvernu est partu spantau de s’idea de su segretàriu. Su ministru Calenda, Veltroni, Zanda e Napolitano ant criticau sa cosa.
  • Totu prontu po su referendum de su 22 de ledàmini in Lombardia e Vèneto. Bòfiu de sa majoria de centru dereta chi guvernat in custas regionis, pruschetotu de sa Lega, su referendum est de carateri consultivu po pediri a su Stadu un’autonomia prus manna. Po cussus chi funt contràrius a su referendum, ca costat puru meda, sa pregunta  si podiat fai sena de andai a votai, comenti difatis at fatu s’Emìlia Romagna.
  • Sardìnnia: sa Giunta regionali at aprovau sa Finantziària 2018-2020 proposta de s’Assessori a su Bilàntziu Raffaele Paci. Sa lei prebidit s’aumentu de is intradas tributàrias de 120 millionis finas a  6 milliardus e 276 milla èuros. A sa fini at a essi una manovra de 7 milliardus e 724 milla èuros, su 2% in prus cunfrontu a s’annu passau.
  • Tensioni sàbudu in Casteddu in ocasioni de s’inauguratzioni de sa setzioni de CasaPound in Is Mirrionis. Unu corteu apariciau de su coordinamentu antifascista at manifestau contra a Casa Pound. Slogan de una parti e de s’àtera ma nisciunu incidenti po mori de sa presèntzia de sa polizia chi no ddus at fatus atumbai.
  • Su Casteddu nc’at bogau a Rastelli pustis de sa de cuàturu derrutas. S’allenadori nou est Diego Lopez chi at firmau unu cuntratu de duus annus. Lopez connosciit beni sa Sardìnnia ca at giogau in su Casteddu de su 1998 a su 2010.
  • Migrantis: mancat sceti sa firma po mudai s’ex presoni de Macumère in unu CPR “Centro di permanenza e rimpatrio”. Sa cunfirma pustis de un’atòbiu in sa Prefetura de Casteddu innui ant pigau parti sa rapresentanti de su Ministeru de s’Internu Pantalone, su Presidenti Pigliaru, su Presidenti de s’Anci Deiana e su sìndigu de Macomer Succu.
  • Cida de novas in Catalùnnia. Is giugis spagnolus ant fatu arrestai duus leader de duas organizatzionis indipendentistas catalanas (Anc e Omnium). Is arrestaus funt Jordi Sánchez e Jordi Cuixart, spriculitaus po “avolotu” po is manifestatzionis in Barcellona de su 20 e 21 de su mesi de cabudanni. Po su Presidenti indipendentista catalanu is duus funt “prisoneris polìticus”.
  • Ma sa nova prus manna est de sabudu. A sa fini su premier spagnolu Rajoi dd’at fatu: at apricau s’art. 155 de sa costitutzioni spagnola e at suspèndiu s’autonomia de sa Catalùnnia. Luegu manifestazionis de is indipendentistas in Barcellona.
  • In Austria is popolaris de s’OVP ant bintu is eletzionis de domìnigu 15 de ledàmini cun su 31,4 % de is votus. Su partidu de dereta estrema FPO cun su 27,4% de is votus est sa segunda fortza polìtica. Su partidu socialdemocràticu at pigau su 26,7% de is votus. OVP e FPO iant a podi formai una majoria insoru in su Parlamentu e Sebastian Kurz, su leader de s’OVP iat a podi diventai primu ministru.

de Massimiliano Meloni