It’est sutzèdidu chida colada. Dae su 22 a su 28 de Freàrgiu

Su resumu de is novas prus de importu de chida colada pro is giornales

Pìndulas 22-28 de Freàrgiu
  • Matteo, unu pitzinnu de 8 annos at imbentadu unu faeddu nou. Cun sa maistra sua at iscritu a s’ “Accademia della Crusca” pro preguntare de fàghere intrare in s’italianu “ Petaloso”, prenu de pètalos. S’Acadèmia at naradu chi eja, pro premiare puru s’ingegnu de su pitzinnu.
  • Eletziones in Iran. Ant votadu 33 milliones de iranianos, su 60 pro chentu de is chi podiant votare. Dae is primos resurtados paret chi siat binchende sa polìtica de reformas de su Presidente Hassan Rohani, autore de s’acòrdiu a pitzu de su nucleare, chi at portadu s’agabbu de is santziones.
  • Berlino, allarme emigrantes. Nde sunt isparèssidos 143 mìgia in su 2015. Giai su 13 pro chentu de is chi sunt lòmpidos in Germània. De seguru medas de is chi ant pedidu deretu de asilu ant sighidu su biàgiu in àteros paisos.
  • In Sìria intrat in vigèntzia s’assèliu negotziadu dae Rùssia e Istados Unidos. Ma s’ong denùntziat bombardamentos in is tzitades de Aleppo e Hama. S’Osservatòriu sirianu pro is deretos de is òmines no at ischidu nàrrere cun seguresa s’identidade de is aeroplanos.
  • Fascìculu Wikileaks. Ispionàgiu americanu pro Silvio Berlusconi e carchi cussigeri de is suos, cando fiat Presidente de su Consìgiu. Sa Procura de Roma est averiguende sa chistione. Sa Ministra pro is reformas Maria Elena Boschi at naradu chi no est atzetàbile un’atividade de ispionàgiu rispetu a unu guvernu alleadu de is Istados Unidos.
  • Su Senadu italianu at naradu chi eja a is uniones tziviles. 173 votos a favore e 71 contra. Immoe sa chistione passat a sa Càmera de is Deputados. Dae sa lege però isparessent sa possibilidade de adotare pipios e s’òbligu de èssere fideles.
  • Pustis de una chida de sa morte de s’iscritore Umberto Eco, lompet in libreria s’ùrtimu libru suo “Pape Satan Aleppe”. In sa die de s’essida at bèndidu sa bellesa de 75 mìgia còpias.
  • Agatados arrogheddos de plàstica in mesu a is tziculates. S’azienda americana Mars at torradu a leare dae is mercados de 55 Paisos ( in Itàlia puru) totus is produtos chi est mègius a consumare intre de su 19 de làmpadas de su 2016 e s’8 de Ghennàrgiu de su 2017.
  • Atenados in Sardigna. Addòbiu in su Viminale cun su Ministru Angelino Alfano, su capu de sa Politzia Alessandro Pansa e su rapresentante de s’Anci Sardigna Pier Sandro Scano. Prevenimentu e atziones de cuntrastu pro firmare is atentados contra a is amministradores locales.
  • In sa bidda de Ales su Ministru de sa Giustìtzia Andrea Orlando at leadu parte a s’abertura de s’Annu Gramscianu, cun sa tzerimònia de su prèmiu “Gramsci visto da dietro le sbarre”, aparitzadu de su sòtziu “Casa natale Antonio Gramsci Onlus” e riservadu a is presoneris.

de Manuela Ennas