It’est sutzèdidu chida colada. Dae su 27 de làmpadas a su 3 de argiolas 2016

Su resumu de is novas prus de importu de chida colada pro is giornales

Pìndulas. 27 de làmpadas - 3 de argiolas 2016
  • Bangladesh. Atacu terrorìsticu in sa tzitade de Dacca in Bangladesh. Chenàbura a merie una truma de òmines sunt imbucados in unu ristorante tzerriende “Allah est mannu”. Dae se gente chi bi fiat  ant fatu foras totu is chi non connoschiant su Coranu. Intre de custos puru noe italianos chi fiant in ue pro traballu. Paret chi is militantes jihadistas èsserent de sa truma “Jumatul Mujahedeen Bangladesh”
  • Europeos de fùbalu. S’Itàlia non bi l’at fata. In sa partida contra a sa Germània at pèrdidu a is rigores, bessende gasi dae is europeos. Dispraghere mannu pro is tifosos, is giogadores e s’allenadore Antonio Conte chi pustis de custa esperièntzia at a lassare s’iscuadra pro allenare su Chalsea s’annu chi intrat.
  • Pro sa morte de Yara Gambirasio – sa pitzochedda de 13 annos de Brambate, isparèssida su 26 de Onniasantu de su 2010 e agatada morta pustis de tres meses – sa Corte de Assise de Bergamo at cundannadu in primu gradu a s’ergàstolu Massimo Bosetti. Sa proa chi prus de àteras no at lassadu dudas a sa Corte est cussa de su dna de Bossetti agatadu in sa roba de Yara. S’abogadu de Bossetti at giai naradu chi ant a fàghere ricursu.
  • Su Papa emèritu Benedetto XVI at festadu is 65 annos de ordinatzione satzerdotale. Sa tzerimònia s’est tenta in su monastèriu Mater Ecclesiae in Vaticanu. Papa Francesco at torradu gràtzias a Ratzinger, narende chi sa devotzione e sa fidelidade chi lompent dae issu sunt un’agiudu mannu pro totu sa Crèsia e donant fortza meda e cuntentesa manna a issu
  • Su fogu est torrende a fàghere a tìmere sa Sardigna. In custas dies est tocadu a su Màrghine, eris mescamente a sa bidda de Sèdilo e a is sartos a inghìriu. Is pampas, ispintas de sa fortza de su bentu estu, ant portadu s’inferru in mìgias ètaros de pastura. Atzìchidu mannu pro sa gente, pro is pastores  e is massajos de sa zona chi ant tentu dannos meda, perdende siendas e animales.
  • Gavoi. Agabbu de chida dedicadu a sa literadura. Sa bidda difatis at acollidu sa de trèighi editziones de su fèstival literàriu “L’Isola delle Storie”. A presentare su programma est istadu s’iscritore Marcello Fois paris cun s’Assessora regionale a sa cultura Claudia Firino. Ocannu puru su fèstival est cunfirmadu un’addòbiu de importu pro autores e amantiosos de literadura.
  • Su Presidente de sa Regione Sardigna Francesco Pigliaru at naradu chi no a sa mudada de giunta. Pro immoe is assessores abarrant is chi sunt. At naradu puru chi si unu cras at a detzìdere, dd’at a fàghere in autonomia, sena chi siant is partidos a ddi nàrrere ite nùmenes seberare.

de Manuela Ennas