It’est sutzèdiu cida passada. De su 3 a su 9 de ledàmini 2016

Su resumu de is novas prus de importu de cida passada po is giornalis

pindulas-3-9-de-ledamini-2016
  • Su primu Diretori de sa Asl ùnica de sa Sardìnnia Fulvio Moirano at firmau su cuntratu cun sa Regioni. De su 15 chi benit de custu mesi at a fai su manager de sa Asl de Tàtari e pustis, de su primu de gennàrgiu su manager de s’Asl Ùnica. 64 annus, de sa Ligùria, Moirano at a amministrai unu bilànciu de prus de 3,2 milliardus de èurus.
  • Segundu unu stùdiu de Il Sole 24 Ore sa Sardìnnia in su 2015 est stètia asuta de sa mèdia natzionali de is furas. Difatis in Itàlia sa mèdia est stètia de 4430 furas dònnia 100 milla abitantis, invecis in Sardìnnia est stètia de 3.224. A s’ùrtimu postu de custa classifica nc’est sa provìncia de Aristanis, cun sceti 1995 furas. Nc’est de nai puru chi in Sardìnnia is furas funt caladas de su 7,1% cunfrontu a s’annu prima.
  • Serrat a S. Antiogu su Museu de su Bisso. S’ùrtima ordinàntzia de su Comunu narat chi Crara Vigo, s’artista famada chi traballat su Bisso, depit lassai su Magasinu de su Monti po nexi de s’impiantu elètricu chi est fora de lei. Po permiti a Crara Vigo de sighiri s’òpera sua si fiant mòvias personas famadas comenti s’atora Maria Grazia Cucinotta chi iat fatu una petitzioni online.
  • Su Sìndigu de Parma Federico Pizzarotti at lassau su Movimentu 5 Steddus. Pizzarotti dd’iat suspèndiu Beppe Grillo de su Movimentu poita ca fiat spricullitau po abusu d’ofìtziu, ma s’incurpadura dd’ant arcivada cida passada.
  • Ignazio Marino est stètiu asciòlliu de s’incurpadura de peculau po s’impreu de sa carta de crèditu de s’aministratzioni candu fiat Sìndigu de Roma. Immoi nascit una chistioni polìtica po su PD e pruschetotu po su Presidenti de su partidu Orfini e po su Segretàriu Renzi, ca iant fatu dimiti Marino s’annu passau.
  • Bersani puru pigat sa parti de su No po su chi pertocat su referendum costitutzionali. In un’intervista a su Corriere della sera narat chi cussus de Renzi apitzus de sa modìfica de sa lei eletorali funt sceti fueddus e chi in un’annu e mesu no at agiumai intèndiu chistionai de arreformas aìnturu de su PD.
  • Si contant is mortus e is dannus pustis s’infrusiada de s’uraganu Matthew asuba de is Caraibi. Matthew at fatu mortus in Cuba, in Santo Domingo e pruschetotu in Haiti, innui funt mortas 184 personas. In Florida, in is Stadus Unius, dannus medas e duus mortus.
  • Su Prèmiu Nobel nou po sa paxi est Juan Manuel Santon Calderòn, su Presidenti de sa Colòmbia.
    Calderòn at arreciu su Nobel poita dd’ant bòfiu arreconnosci s’importu de su traballu fatu po portai sa paxi in sa Natzioni sua, pustis dexinas de annus de gherra civili.
  • In unu vìdeu girau in su 2005 e pubricau de su Washington Post Donald Trump fait cumentus lègius meda e sessualis apitzus de is fèminas. Trump s’est scusau ma su vìdeu arriscat de ddi fai perdi is eletzionis.

de Massimiliano Meloni