It’est sutzèdiu cida passada. De su 30 de ledàmini a su 5 de donniasantu 2017

Su resumu de is novas prus de importu de cida passada po is giornalis.

Pìndulas. 30 de ledàmini - 5 de donniasantu 2017
  • Di Maio narat marranu a Renzi: proponit unu confrontu in televisioni cun su segretàriu de su PD. A Renzi no ddi parit berus e narat chi eja. S’atòbiu est prevìdiu po su 7 de su mesi de donniasantu chi benit. Renzi iat nau chi Di Maio est unu chi spaniat fàulas.
  • Serradura de sa campagna eletorali in Sitzìlia, ca votant domìnigu 6 de su mesi de donniasantu. In s’Ìsula comìtzius de Berlusconi, Salvini, Grillo. Renzi invecis si nc’est andau in Amèrica ca dd’iat cumbidau Obama.
  • Berlusconi e Dell’Utri torra spricullitaus, custa borta de sa Procura de Firenze, po is bombas postas de sa màfia in Firenze, Roma e Milano in su 1993. Segundu su boss Graviano, intercetau in prisoni, Berlusconi fiat su mandanti de is atentaus.
  • Catalùnnia. Su Presidenti catalanu Puidgemont, spriculitau de is giugis ispagnolus po ribellioni e àteras curpas, si nc’est fuiu in Bruxelles impari a cincu ministrus. Firmaus àterus otu ministrus catalanus. Po Puidgemont e is àterus ministrus chi s’agatant in Belgio is giugis ispagnolus ant spicau unu mandau d’arrestu europeu.
  • A Paul Manafort, s’ex responsàbili de sa campagna eletorali de Trump, dd’ant firmau po nexi de is spriculitamentus apitzus de su Russiagate, eus a nai is fichiduras de sa Rùssia in is eletzionis presidentzialis americanas de su 2016. Est incurpau de cungiura e ddu podint cundennai a 80 annus de prisoni. Trump po immoi at nau chi est sulenu, ca issu no nc’intrat nudda.
  • S’atori americanu Anthony Rapp at incurpau Kevin Spacey, atori famau e prèmiu Oscar, de dd’ai molestau in su 1986, candu teniat sceti 14 annus. Spacey at nau chi no s’arregordat, ca forsis fiat imbriagu, ma at domandau perdonu e totu. At nau puru chi oi est omosessuali.
  • Atentau terrorìsticu in New York: otu mortus e 11 ingortus. Su terrorista at impreau unu pick up po atumbai sa genti chi passillàt in Manhattan, faendi festa po Halloween. Est un’òmini de 29 annus, nadiu de s’Uzbekistan. Sa politzia dd’at firmau luegu, sparendi-ddu e immoi est in prisoni. At nau chi est de s’ISIS.
  • Sardìnnia. 17 spricullitaus de sa Procura de Lanusèi po ai furau is provetas cun su DNA de is ollastrinus de su Parcu Genos de Perdasdefogu. Is provetas furadas funt casi 25 milla, cun su DNA de 14 milla personas. Impari a is àteras, 230 milla in totu, serbint a studiai sa vidalonga de is ollastrinus. Is spricullitaus funt ex aministradoris e presidentis de su Parcu e puru calincunu sìndigu chi iat permìtiu arbitrariamenti de consultai s’anàgrafi comunali po su stùdiu.
  • Su Movimentu de is pastoris sardus suspendit sa protesta, inghitzada po pediri a sa Regioni agiudus po sa sicidadi chi est faendi morri su bestiàmini. Nc’est bòfia sa mediatzioni de su Prefetu de Casteddu, Tiziana Costantino, chi s’est pigada s’impignu de preguntai a su Ministeru de sa laurera de cuntzedi is agiudus.

Boxis