It’est sutzèdiu cida passada. De su 6 a su 12 de donniasantu 2017

Su resumu de is novas prus de importu de cida passada po is giornalis

Pìndulas. 6 - 12 de donniasantu 2017
  • Eletzionis regionalis in Sitzìlia: at bintu su centru dereta e Nello Musumeci at a essi su Presidenti de sa Regioni. At pigau su 39,8% de is votus e is listas acapiadas a issu ant pigau su 42%. Su M5s est su partidu prus votau, cun su 26,6% de is votus e su candidau suu, Giancarlo Cancelleri at pigau su 34,6% de is votus.. Sceti su 18,6% de is votus po su candidau de su PD e de Alternativa Popolare Fabrizio Micari. Is listas acapiadas a issu ant pigau su 25%. Nc’est de nai puru chi est andau a votai sceti su 46,76% de is eletoris.
  • Polèmicas in su PD po sa derutta eletorali in Sitzìlia. Su renzianu Faraone incurpat a su Presidenti de su Senau Pietro Grasso poita ca no s’est bòfiu candidai a Presidenti e in prus si nc’est bessiu puru de su PD. A Grasso, chi arrespundit spantau, ddu difendint cussus de Mdp e Sinistra Italiana, chi denùntziant sa barra de su PD renzianu.
  • Pustis su resultau de is eletzionis sitzilianas su leader de su M5s Di Maio annuddat su confrontu in televisioni cun Renzi. Po Di Maio su segretàriu de su PD no est prus su rivali polìticu suu. Renzi ddu incurpat de ddu timi.
  • A parti is eletzionis in Sitzìlia, domìnigu passau nci fiant is eletzionis puru in sa citadi de Òstia. Centru dereta e M5s ant a andai a su ballotàgiu. Ma sa nova est chi Casa Pound, su movimentu de dereta estrema, at pigau su 9% de is votus.
  • In Òstia ant afracau una truma de sa Rai chi fiat faendi unu servìtziu giornalìsticu po sa trasmissioni “Nemo – Nessuno escluso”. Ingortus su giornalista Daniele Piervincenzi e s’operadori Edoardo Anselmi. S’afracadori est Roberto Spada, de su clan mafiosu Spada, chi in is ùrtimas eletzionis at agiudau Casa Pound. Sa Procura dd’at firmau luegu.
  • Degòlliu mannu in Svètzia. Sa natzionali italiana de palloni at pèrdiu 1-0 sa primu partida de su sparègiu po andai a is Mondialis. S’Itàlia at pigau parti a totu is editzionis de is mondialis, a parti cussa de su 1958.
  • In Amèrica un’ex militari de 26 annus, Devin Patrick Kelley, at bociu a fusili 26 personas in una crèsia de Sutherland Springs, in Texas. Su bocidori est mortu fuendi-sì in vetura. No est terrorismu. S’òmini at fatu unu degòlliu po nexi de ai certau cun sa sorga. Polèmicas po sa spainadura de is armas me is Stadus Unius.
  • Scòpiat su scàndalu Paradise paper ca de unu stùdiu legali de is ìsulas Bermuda est bessida a pillu una lista de nòminis de genti e impresas chi ant fatu investimentus finantziàrius me is paradisus fiscalis. In sa lista nci funt impresas comenti Apple e Facebook, sportivus comenti su campioni de F.1 Hamilton, cantantis comenti Bono e Madonna, polìticus comenti su ministru americanu Ross, su presidenti colombianu Santos e indiritura sa regina Elisabetta.
  • Sa Procura Ispagnola at arrestau puru sa Presidenti de su Parlamentu catalanu Carme Forcadell. Forcadell po bessiri de prisoni at dèpiu pagai una cautzioni de 150 milla èurus. A issa puru, comenti a is ministrus catalanus giai firmaus, dd’ant incurpada de ribellioni e de malversatzioni.
  • Sa Sardìnnia at festau Gigi Riva chi su 7 de donniasantu at fatu 73 annus. Su campioni de su Casteddu est nàsciu in Leggiuno ma podeus nai chi est sardu de su 1963, candu dd’iant trasfèrriu de su Legnano a su Casteddu.
  • Sa Regioni at assignau sa continuidadi territoriali S’Alighera – Roma in arioplanu a sa cumpangia Blue Air, chi est s’ùnica chi apat presentau un’oferta pustis sa renùntzia de Alitàlia, chi at bòfiu mantenni sceti sa continuidadi S’Alighera – Milano.
  • Atòbiu de importu in Roma intra de su Presidenti de sa Regioni Pigliaru, acumpangiau de s’Assessori a su Bilàntziu Paci, e de su Presidenti de su Consillu Gentiloni. Po Pigliaru s’atòbiu est andau beni po su chi pertocat su reconnoscimentu de sa conditzioni de insularidadi in Europa e sa continuidadi territoriali. Ma po su chi pertocat tzerachias militaris e acantonamentus su Guvernu sighit a no donai respostas.

de Massimiliano Meloni