It’est sutzèdidu chida colada. Dae su primu a su 7 de Freàrgiu

Su resumu de is novas prus de importu de chida colada pro is giornales

Pìndulas. Dae su primu a su 7 de Freàrgiu
  • UE: su Parlamentu Europeu at reconnòschidu a sa Sardigna e a sa Sitzìlia sa cunditzione de èssere ìsula. Sa risolutzione fiat istada presentada dae Salvatore Cicu (Fi/Ppe) e Michela Giuffrida (Pd/S&D). Immoe a is duas regiones ddis tocant prus finantziamentos pro is isvantàgios chi sufrint essende ìsulas.
  • Meridiana. B’est acòrdiu cun sa cumpangia Qatar Airways. Pro immoe ant sigladu unu Memorandum, ma ant a serrare is tratativas intro de su mese de làmpadas
  • Adiosu Pescara, S’Alighera e Crotone. Sa bussinada de Ryanair. Sa cumpangia aèrea irlandesa dd’at cunfirmadu: 16 lìnias serradas, 800 mìgia clientes pèrdidos, 600 postos de traballu andados in fumu. Su sèberu a cantu paret est una protesta contra a sa crèschida de is tassas de is aeroportos. In S’Alighera avolotu mannu de is chi traballant in s’iscalu
  • Universidade de Casteddu: arriscu de menguadas. Adunàntzia pùblica in s’Ateneu pro si chesciare. Una batalla contra a is càrculos natzionales chi penalizant is universidades sardas. Su retore Maria Del Zompo at naradu chi in Abrile at a lòmpere sa mannaja.
  • Su guvernadore de sa Campània Vincenzo De Luca est istadu assoltu dae sa Corte de Apellu de Salerno “ pro ite ca su fatu non sussistet”. Immoe at a pòdere guvernare sena de su bisu malu de sa lege Severino.
  • Uniones tziviles. Sighit sa dibata in Parlamentu. Pro su DDL “Cirinnà” at a contare meda su votu de su “Movimento cinque stelle”. Ma sa dibata sighit in cue puru pustis chi Beppe Grillo at chistionadu de “libertade de cussèntzia” in su blog suo.
  • In Ispagna galu totu firmu. Is tratativas intre Partidu Sotzialista e Podemos pro formare su guvernu non lompent a una solutzione chi ddos pòngiat de acòrdiu.
  • Il Cairo. Dispraghere mannu pro sa morte de Giulio Regeni. Teniat 28 annos, originàriu de su Friuli, chircadore de s’Universidade de Cambridge, s’agataiat in Egitu pro sa tesi de làurea in economia. Fiat isparèssidu su 25 de Ghennàrgiu e dd’ant agatadu mortu su 3 de Freàrgiu. S’autopsia narat chi est mortu ca dd’ant segadu s’ossu de su tzugru. Fintzas a immoe s’Egitu at declaradu chi est istadu un’atu criminale e non terrorìsticu. Ma sa chistione lassat dudas medas ca issu aiat naradu chi s’intendiat in perìgulu, sende chi fiat in cuntatu cun opositores de su regime de Al Sisi.
    Una truma de investigadores italianos est in Egitu pro cumprèndere ite est sutzèdidu.
  • Pròfugos sirianos a tròparas in sa frontera turca, Sunt fuende·si·nche dae is bombardamentos de s’esèrtzitu fidele a su regime di Bashar al Assad, agiuadu puru dae is fortzas russas. Su premier turcu Ahmet Davutoğlu at faeddadu de 12 mìgia sirianos chi s’agatant in sa làcana intre de Sìria e Turchia, isetende de nche pòdere intrare .S’esèrtzitu sirianu at assitiadu is zonas de Alepo chi is rebellos sunt tenende a suta de su poderiu issoro dae su 3 de Freàrgiu, impedende chi is frunimentos lompant in tzitade.
  • Barack Obama est intradu in sa Sotziedade Islàmica de Baltimora, unu de is prus tzentros musulmanos mannos de is Istados Unidos. Dae cando est Presidente, est sa primu borta chi imbucat in una moschea in is Istados Unidos, addobiende puru is rapresentantes de sa comunidade musulmana. Ddis at naradu “’S’Islam est istadu semper parte de s’Amèrica”.
  • Sa salma de Padre Pio at lassadu pro sa primu borta San Giovanni Rotondo. Papa Bergoglio dd’at fatu portare a Roma pro su Giubileu. Is fideles sunt arribende fitianamente pro ddi torrare gràtzias.

de Manuela Ennas