S’ex Arsenali de Madalena torrat a sa Regioni

Su premier italianu e su guvernadori de sa Sardìnnia Pigliaru firmant un’acordu po torrai a sa Regioni s’ex Arsenali de Madalena.

Acordu po Madalena

S’ex Arsenali de Madalena torrat a sa Regioni. Ariseru in Roma su Premier Gentiloni e su Presidenti de sa Regioni Sardìnnia Pigliaru ant firmau un’acordu po torrai a sa Regioni totu s’àrea, chi fiat in stadu de disamparu pustis su trasferimentu in su 2009 de su G8 de s’arcipèlagu a sa citadi de L’Aquila.

S’acordu prebidit s’acabbu de is interventus de bonìfica e de sanamentu ambientali po permiti su rilànciu econòmicu, turìsticu e sociali de s’arcipèlagu. Su finanziamentu at a essi de 50 millionis e 400 milla èuros.

“Est un’acordu de importu poita ca lìberat una situatzioni firma de tempus meda e donat prospetivas de cramu po sa bellesa e po su turismu, po sa nàutica de ispassu, una nova bona po sa Sardìnnia e s’Itàlia” at nau Gentiloni.

“In su 2014 eus pigau s’impignu cun is eletoris de fai torrai a partiri su cantieri de s’Arsenali a Madalena e oi seus innoi po ddu mantenni” at nau Pigliaru. “Cun is finantziamentus liberaus e cussus chi eus aciungi eus a ingendrai svilupu, ocupatzioni e benèssiri” at aciuntu su guvernadori.

de Boxis