Referendum apitzus de sa conditzioni de essi ìsula. Depositadas 92 milla firmas

Su Comitau promovidori at depositau in Tribunali 92 milla firmas po su referendum apitzus de su reconnoscimentu de sa conditzioni de essi Ìsula.

Referendum apitzus de sa conditzioni de essi Ìsula

Su Comitau promovidori de su referendum apitzus de su reconnoscimentu a sa Sardìnnia de su princìpiu de sa conditzioni de essi Ìsula at depositau ariseru in su Tribunali de Casteddu is 92 milla firmas arregoltas me is mesis passaus.

S’arregolta de is firmas fiat inghitzada in su mesi de cabudanni passau po mori de su partidu de is Riformatori, ma luegu dd’at portada a innantis polìticus de dònnia orientamentu.

Su nùmeru de is firmas arregoltas est un’arrennèscida manna, ca ndi bastànt 10 milla po promovi su referendum.

Sa tarea de su referendum est de arreconnosci in sa Costitutzioni italiana sa conditzioni de insularidadi de sa Sardìnnia, chi est stètia annuddada in su 2001 cun s’arreforma de su Tìtulu V de sa Costitutzioni. Po is promovidoris a arreconnosci sa situatzioni de insularidadi de sa Sardìnnia bolit nai arreconnosci puru sa conditzioni de sbàntagiu sua.

“Custu est unu resultau ispantosu” at nau su Presidenti de su Comitau promovidori Roberto Frongia “ e dd’at permìtiu sa trasversalidadi de is personalidadis chi ant pigau parti”.

Prexau meda su Presidenti de su Consillu Regionali Gianfranco Ganau, chi at cummentau chi custu est unu resultau sìmbolicu meda ma at avèrtiu chi sa batalla at a essi longa, ca a mudai sa costitutzioni est una cosa dilicada.

Pustis s’eja de sa Corti de Apellu, su Presidenti de sa Regioni at a pregonai su referendum, chi at a essi de tipu consultivu sena de quorum.

de Boxis