Referendum pro is berrinas : at bìnchidu s’astensione

No est lòmpidu a su quorum su referendum pro is berrinas. Petzi su 31,19% de is italianos est andadu a votare

su resurtadu de su referendum

Su referendum de su 17 de Abrile pro is berrinas no est lòmpidu a su quorum. Mancari bi siat istada informatzione e publitzidade manna a pitzu de s’argumentu, sa gente no est andada a votare, preferende a non leare parte e a no espressare unu parre.

Is assòtzios de su comitadu pro s’eja ant giai decraradu chi ant a fàghere ricursu a su Ministru de s’Isvilupu econòmicu pro pedire su firmu de is chimbe cuntzessiones intro de is 12 mìglias. Custas cuntzessiones, a cantu narat su comitadu, sunt iscadidas dae tempus, e sa pròroga no est legìtima pro ite ca sa norma narat chi non si podent prorogare is tìtulos iscadidos. Duncas sa partida no est galu serrada. In prus de su ricursu a su Mise, su comitadu pro s’eja nde tenet prontu un’àteru puru in sede europea pro sa violatzione chi s’Itàlia at fatu de is normas chi regulant s’estratzione de is idrocarburos. Difatis s’europarlamentare Barbara Spinelli at presentadu un’interrogatzione a su Cummissione europea preguntende de abèrrere unu protzedura de infratzione contra a s’Itàlia pro àere violadu is règulas pro is cuntzessiones.

Mancari siant istados 13 milliones is italianos chi ant votadu eja a su referendum, e casi 16 milliones is chi sunt andados a votare, cummentos graes a pitzu de su resurtadu ddos ant lassados mescamente cussos polìticos chi aiant naradu a is tzitadinos de non andare a votare.

Su premier Matteo Renzi, sustènnidu dae un’ala de su partidu suo, at decraradu de nd’èssere cuntentu meda de comente est andada sa cosa, ca issu l’aiat naradu chi custu referendum non diat èssere serbidu a nudda. “Su guvernu – at naradu Renzi – no est su binchidore. Is binchidores sunt is ingegneris e is operajos chi traballant cun is berrinas. Ma is chi ant pèrdidu bi sunt e tenent nùmene e sambenadu e sunt is chi ant promòvidu su referendum pro is berrinas”.

Renato Brunetta, ghia de is parlamentares de Forza Itàlia, imbetzes at naradu chi sa de Renzi est comente sa bìnchida de Pirro. Polèmicas puru in su Movimentu Cinque Stelle pro su cumbidu de su premier a no andare a votare e sa reatzione sua pro su resurtadu.

In Sardigna at votadu su 32,37% de is chi tenent deretu, in lìnia cun sa mèdia natzionale. Sunt andados a votare 410 mìgia sardos e su 92,40% at votadu chi eja. Unu sinniale forte chi no at avolotadu su Presidente Pigliaru mancu pagu pagu. Antzis at cummentadu narende chi su fallimentu de su referendum est su signu de unu tempus de assentu.

De Manuela Ennas