Referendum. A sa fini eus a votai

Cun su referendum de su 4 de su mesi de Idas is italianus ant a podi nai eja o no a su ddl Boschi, aprovau in manera definitiva in su mesi de Abrili passau.

Su referendum costitutzionali

Seus acanta de lompi a sa dì de su referendum, e iat a essi ora puru, ca apitzus de su referendum no nc’est stètiu unu confrontu sulenu. Pagus àteras bortas s’opinioni pùblica dd’ant partzida comenti po custu votu. Unu tifu comenti nimancu una partida de palloni, cussus chi funt po s’eja contra a cussus chi funt po su no. E is tifosus parint prontus a morri puru po sustenni sa cambarada insoru.

Nosu de Boxis eus chistionau de s’arreforma costitutzionali candu ant aprovau sa lei (su ddl Boschi) e no ndi boleus torrai a chistionai. Sena de pigai parti po s’una o s’àtera arrexoni apitzus de su referendum arregordaus sceti calincuna cosa.

In sa stòria Republicana custa est sa de tres bortas chi eus andai a votai po unu referendum costitutzionali. Sa prima est stètia in su 2001, candu iat bintu s’eja cun su 64,20 po centu e iat votau su 34,1 po centu de cussus chi podiant votai. Sa segunda in su 2006, candu iat bintu su no cun su 61,29 po centu e iat votau su 52,46 po centu de cussus chi podiant votai.

Est a favori de s’arreforma sa majoria de su PD ma su partidu est divìdiu. Aìnturu de su PD difatis ddoi est una truma ghiada de D’Alema e de Bersani chi est po su no, contra a su Presidenti de su Consillu Matteo Renzi. Est a favori de s’arreforma puru Ala, sa truma parlamentari de Denis Verdini e su NCD de Alfano, chi fai parti de su guvernu. Ant a votai eja puru Tosi e su movimentu suu Fare, su vice ministru de s’Economia Zanetti cun Scelta Civica e is Sotzialistas Italianus de Nencini. Contra a s’arreforma ant a votai totus is opositzionis: M5s, Sinistra italiana, Fratelli d’Italia, Forza Italia, Udc (a parti Casini chi invecis at a votai eja).

Est de importu a nai chi sigumenti seus chistionendi de referendum costitutzionali, no est prebìdiu unu quorum.

Su quorum est prebìdiu de s’art. 75 de sa Costitutzioni (chi perou at a mudai si passat s’arreforma) po su referendum chi si fait po annuddai is leis ordinàrias:”….Sa proposta sutaposta a referendum est aprovada chi a sa votatzioni pigat parti sa majoria de cussus chi ndi tenint su diritu, e chi a sa proposta dda votant sa majoria de cussus chi ant votau …” Po su referendum costitutzionali invecis s’art 138 de sa Costitutzioni (chi no est mudau de s’arreforma) narat sceti “… Sa lei votada in su referendum no est pregonada, si no est aprovada de sa majoria de is votus validus….”. Duncas, po fai binci s’eja o su no tocat a andai a votai. E mancai calincunu timat, su 5 de su mesi de Idas no nc’at a essi sa fini de su mundu.

de Massimiliano Meloni