Boxis lompit in su web: sa famìllia sarda de is giornalis in lìnia

Un nuovo soggetto nel panorama sardo dei giornali online: dopo l’esperienza cartacea Boxis sbarca sul web, “ pronti ad una nuova sfida”

La famiglia dei giornali online: benvenuto Boxis

Si pedeus scusa po ai stentau. Fiat de diora chi boliaus cumentzai un’artìculu diaici, de candu eus detzìdiu de no bolli morri e de proai a nai ita pensaus in su mundu de is giornalis in lìnia.

Unu mundu, su dei is giornalis in lìnia, prenu de genti chi sciit totu, de genti esperta, chi fait trassas,e a bortas puru de genti chi ballit pagu e nudda. Unu mundu innui is “fàulas” funt usàntzia de dònnia dì, unu logu malu innui is artìculus de pagu contu si càrriant cun una puntualidadi casi svìtzera.

Ddu naraus luegu nosu puru chi in Boxis, comenti in is àterus giornalis in lìnia, ddoi ant a essi artìculus de pagu contu, novas chi ant a fai arriri o ant a scadenai is giudìtzius de is prus scìpius de sa retza (sceti Deus sciit cantu nci ndi funt). Is crìticas ant a essi sa majoria ma de seguru no s’ant a leai su sonnu e s’ant a spingi a melliorai sèmpiri de prus, a fai esperimentus cun formas noas de comunicatzioni e a donai logu a ideas e lìnguas diferentis.

Boxis no bolit essi e no at a essi un’entziclopedia, sa boxi de calchi partidu, su bratzu armadu de sa polìtica linguìstica. No, Boxis bolit essi sceti unu giornali, unu giornali in lìnia, innui is artìculus, scritus in sardu, in italianu, in inglesu, in frantzesu bivint impari a su matessi livellu.

Unu giornali chi bolit chistionai de Sardìnnia impreendi puru su binòculu de sa globalizatzioni, unu giornali chi dd’iat a praxi a contai sa Sardìnnia de oi, scapiendi-dda de is cliscès sòlitus de is sagras de bidda e traditzionis agualis de sèmpiri. Agualis poita a bortas si timmit a cambiai.

Torraus gràtzias a chini s’at sighidu candu su giornali bessiat  de paperi in edìcula e s’at spintu a andai a innantis. Immoi si cumbidaus a intrai e a leai parti in sa famìllia manna de Boxis. Podeis imbiai is sinnalatzionis bostas, agiudai a fai cresci cussa chi in su sentidu nostu est una retza de amantiosus, una retza de giornalismu spaniau in totu su territòriu ( e cun custu boleus nai totu su mundu e no sceti in cuàturu costeras de custa ìsula  de su Mediterràneu) chi potzat donai dinnidadi de crònaca puru a chini bivit a su sòlitu in is làcanas.

de Mauro Melis