Liau de “Su Sennori de sa Musca” de William Golding

“Is òminis produsint su mali comenti is abis produsint su meli”. William Golding

Su Sennori de sa Musca de William Golding

“Tui ses unu scimpru” naràt su Sennori de sa Musca “sceti unu scimpru, un’ignoranti”.
Simone iat mòviu sa lìngua, chi fiat totu unfrada, ma no iat nau nudda.
“No ti parit?” iat nau su Sennori de sa Musca, “no ses sceti unu scimpru?”
Simone dd’iat arrespostu cun sa matessi boxi sena de sonu.
“E insaras” iat nau su Sennori de sa Musca, “iat a essi mellus chi tui curressis atesu a giogai cun is àterus” Issus creint chi tui siast unu pagu tocau a conca. Tui no as a bolli miga chi Ralph cretat chi tui ses unu pagu tocau a conca, no? Simpàticu t’est Ralph, no? E puru Piggy, e puru Jack, no?”
Sa conca de Simone fiat pesada unu pagu assusu. Is ogus suus no si podiant stacai de su Sennori de sa Musca suspèndiu in su sbuidu ananti de issu.
“Ita ses faendi innoi totu a solu? no ti fatzu a timmi?” Simone iat tentu unu sàddidu.
No nc’est nemus chi ti potzat agiudai. Sceti deu. E deu seu sa Bèstia.
Sa buca de Simone si fiat aberta cun fatiga e ndi fiant bessius aforas fueddus discumprèndius: “Una conca de porcu apitzus de unu pau”.
“Ita idea, a pensai chi sa Bèstia fessit una cosa chi si podessit cassai e bociri!” iat nau sa conca de porcu. Po unu pagu sa foresta e totu is àterus logus chi si podiant biri aditzu fiant arretumbaus in sa parodia de un’arrisu. “Ddu sciiast, no?….chi deu seu una parti de tui? Beni innoi acanta, acanta, acanta! Chi deu seu s’arrexoni e no nc’est nudda de fai? Chi is cosas andant comenti andant?”
S’arrisu fiat arretumbau ancora.
“Toca,” iat nau su Sennori de sa Musca, torra de si àterus, e eus a scaresci totu”.
Sa conca de Simone giràt, scopiàt. Is ogus suus fiant mesu serraus, comenti chi strocessint cussa cosa disdorosa apitzus de su palu. Issu sciiat chi fiat acanta de ddi benni una de is crisis suas. Su Sennori de sa Musca fiat unfrendu-sì comenti a unu palloni.
“Custa est cosa de arriri. Ddu sciis beni meda chi tui m’as a atobiai sceti inguni… duncas no depis circai de fui.”
Su corpus de Simone fiat arcau e cìrdinu. Su Sennori de sa Musca chistionàt po mori de sa boxi de unu maistu de scola.
“Custa brulla est durada bastanti, diaderus. Pipiu miu poberu straviau, tui creis de ndi sciri prus de mei?”
Nc’iat stètiu unu pasu.
“Depis fai atentzioni. Seu acanta de perdi sa passièntzia. No ddu biis? No ddoi est logu po tui. Dd’as cumprèndiu? In cust’ìsula s’eus a spassiai. Duncas no nci provis nimancu, piciocu pòberu straviau miu, asinunca…..”
Simone si fiat acatau chi fiat castiendi aìnturu de una buca manna. Àinturu nci fiat iscuriori, un’iscuriori chi si spaniàt.
“…asinunca”, iat nau su Sennori de sa Musca, “t’eus a bociri. Ddu cumprendis? Jack e Ruggero e Maurizio e Guglielmo e Piggy e Ralph. T’eus a bociri. Ddu cumprendis?”
Simone fiat aìnturu de sa buca. Fiat arrutu e fiat svèniu.