Sa primu Cunferèntzia aberta de su sardu

Una Cunferèntzia aberta de su sardu pro unu benidore mègius de sa limba. S’addòbiu est pro su 14 de Ghennàrgiu in sa sede de s’Ex Me de Nùgoro.

Cunferèntzia aberta de su sardu

Su sòtziu culturale Acordu tzèrriat a pare totus is chi tenent a coro sa sorte de sa limba sarda e aparitzat una Cunferèntzia aberta de su sardu pro su 14 de Ghennàrgiu chi intrat, in sa sede de s’Ex Me de Nùgoro.

Su sòtziu Acordu, nàschidu dae pagu tempus, est costituidu dae ativistas e amantiosos de sa limba sarda. Sunt persones diferentes intre de issos pro traballu e esperièntzias ma chi tenet in comunu sa gana de si leare s’impignu de nde fàghere essire sa limba sarda dae sa firmada in ue s’agatat dae meda. Sa dibata a pitzu de sa limba sarda est semper alluta intre de sa gente comune, de is operadores de su setore, de is polìticos ma fintzas a immoe no est lòmpida a unu puntu chi pòngiat totus de acordu.

Sa Cunferèntzia aberta de su sardu bolet èssere un’ocasione noa pro chi is partes si potzant cunfrontare a pare, una mudadura de prospetiva rispetu a sa limba, unu tentativu de afrontare is problemas chi tenet su sardu a manera partetzipativa e inclusiva.

Su sòtziu Acordu cumbidat totus is chi si òcupant de limba sarda e chi podent pònnere a disponimentu s’esperièntzia issoro pro barigare is làcanas chi fintzas a immoe ant firmadu s’ufitzialidade de sa limba sarda. Ma cumbidat puru a chie non tenet esperièntzia ma pensat de bòlere o pòdere donare s’agiudu suo, a totus is chi si sunt acurtziende a sa limba sarda e a is chi ddis diat pràghere a si ddoe acostare, ca est tempus de agatare una solutzione cumpartzida dae totus pro torrare a partire.

Sa Cunferèntzia aberta de su sardu non tenet caràtere polìticu e no at a leare finantziamentos pùblicos o privados ma at a èssere sustènnida petzi dae is chi nd’ant a pigare parte. Custu seberu at a permìtere de garantire sa libertade dae cale si siat cosa chi potzat cunditzionare su resurtadu e sa neutralidade rispetu a ogni positzione presente in campu.

In sa Cunferèntzia ddoe ant èssere reuniones plenàrias cun duos keynote speeches de importu. Unu de custos at a èssere William Cisilino, diretore de s’Arlef (Agjenzie regjonâl pe lenghe furlane) e espertu de polìticas de amparu de is limbas de minoria. Is traballos ant a èssere partzidos in oto panel chi pertocant temàticas de importu e ant a èssere: Paridade linguìstica, Arte e limba sarda, Iscola e Universidade, Istandardizatzione, Mèdios-massivos, Literadura e Editzione in limba sarda, Polìtica linguìstica, Gender e limba sarda.

Pro leare parte a sa Cunferèntzia aberta de su sardu ogni partetzipante si depet marcare a unu panel sighende custu ligàmine. In ogni panel ddoe at èssere unu fatzilidadore chi at a agiudare in su traballu comunu garantende unu clima de collaboratzione e rispetu intre de totus is partetzipantes. Chie nde bolet ischire de prus e bolet abarrare informadu a pitzu de sa Cunferèntzia aberta de su sardu podet sighire sa pàgina ufitziale de su sòtziu Acordu www.acordu.eu. Pro ogni duda si podet iscrìere a cunferentzia.aberta@gmail.com.

Boxis