Novas. Progetu de limba sarda in iscola.

Su 14 de su mese de martzu coladu est cumentzadu su progetu Novas, unu progetu de limba sarda finantziadu dae sa lege 482/99 pro is limbas de minoria.

Progetu Novas in iscola

Nàschidu gràtzias a su traballu cumpartzidu de su Tzìrculu didàticu nùmeru 10 de Tàtari, s’Istitutu Cumprensivu de Mòguru e s’Istitutu Cumprensivu de Seddori, su progetu Novas at retzidu unu finantziamentu dae sa lege 482/99 pro is limbas de minoria pro is annos de iscola 2015/2016 e 2016/2017.

Su progetu Novas est indiritzadu a is classes de su primu tziclu iscolàsticu: duas classes de s’iscola de s’Infàntzia e duas de s’iscola Primària in Tàtari, chimbe classes de s’iscola de s’Infàntzia de Seddori, duas classes de s’iscola Primària de Mòguru e una classe de s’iscola Primària de Masuddas.

Is tareas de su progetu Novas sunt sa promotzione de sa cultura de su bilinguismu italianu/sardu, s’imparu de sa limba sarda, s’avaloramentu de su patrimòniu culturale e de s’identidade de sa comunidade locale e regionale, pro mèdiu de un’impreu de su sardu in manera chi siat prus acanta a sa realidade de ogni die e prus a tesu imbetzes dae is pregiudìtzios chi nde firmant un’impreu normale.

Sa majoria de is pipios de oe non chistionat su sardu e custu progetu chircat de ddos acostare in manera simple a sa limba de is giajos issoro. Is chircas psicolinguìsticas, comente is chi at fatu Antonella Sorace, professora famada de s’Universidade de Edimburgo, mustrant chi sa mente de is pipios podet tènnere profetos imparende a faeddare e iscrìere un’àtera limba, diferente de cussa chi faeddat ogni die. Difatis s’istùdiu de su sardu at a favorèssere s’imparu de is àteras matèrias, un’atentzione prus manna, e prus abilesa fintzas in sa memòria.

Cun s’agiudu de materiales giai aprontados in sardu e movende dae is cosas prus fàtziles, comente si faghet pro is àteras limbas, is pipios ant a fàghere is atividades iscolàsticas normales e a s’agabbu de su cursu s’at a realizare unu giornaleddu, totu in limba sarda, chi at a contare de custas atividades e totu su chi at pertocadu su progetu. Chi tenides praghere podides sighire su progetu Novas in custa pàgina de www.boxis.it, pro ite ca amus a sighire a bos contare ite totu si podet fàghere in iscola cun su sardu.

de Manuela Ennas