It’est sutzèdidu chida colada. Dae su 4 a su 10 de abrile 2016

Su resumu de is novas prus de importu de chida colada pro is giornales

  • Immigrados. Una chida de protestas in Casteddu. Una setantina de immigrados dae sa Somàlia e dae s’Eritrea ant manifestadu in su tzentru de sa tzitade, firmende puru su tràfigu. Pregontant de si nche pòdere andare dae sa Sardigna e refudant de donare is generalidades issoro, ca timent de abarrare serrados in Itàlia.
  • Consìgiu regionale. Sa Corte de Cassatzione at naradu s’ùrtimu faeddu a pitzu de is recursos chi ant treuladu su Consìgiu regionale. Antonio Gaia e Pierfranco Zanchetta de su Upc, Gianfranco Congiu de su Partidu de is sardos sunt consigieris regionales a manera definitiva. Refudadu duncas pro s’ùrtima borta su recursu de is bator ex-consigieris Efisio Arbau e Michele Azara (La Base) Modesto Fenu (Zona Franca) e Gavino Sale (Irs).
  • In is primas eletziones pro su Consìgiu metropolitanu de Casteddu, chi si sunt tentas in custas dies, cun is votos de is amministradores locales de 16 comunas, chi faghent parte de s’ente nou, at bìnchidu su Pd chi si nde pigat 15 sègios, cun prus de su 37,5 pro chentu de is preferèntzias. Ma su candidadu chi at tentu prus votos est Giuseppe Farris de Fortza Itàlia, cun sa lista “Città in cantiere”.
  • S’illargat s’inchesta de sa Procura de Aristanis chi pertocat is apaltos in Sardigna. Sa Guàrdia de Finàntzia de Aristanis e is carabineris de Tonara ant arrestadu àteras 16 persones. Sunt incurpadas de corrutzione. Is iscumbatas, a cantu paret, iscòviant chi b’est istada complitzidade intre de s’ambiente polìticu regionale e locale e is imprendidores e professionistas sardos e continentales puru pro si nde pòdere acaparrare s’apaltu pro s’agabbu de s’istatale Tàtari-Terranoa.
  • Su mundu polìticu italianu in avolotu pro s’inchesta de sa procura de Potenza in subra su petròliu in Basilicata. Is magistrados ant intèndidu puru a sa Ministra Boschi pro su chi pertocat s’emendamentu passadu in sa lege de istabilidade, chi at permìtidu interventos de estratzione de su petròliu in Badde d’Agri. Renzi s’est chesciadu narende chi sa magistradura est tropu istentosa e chi est issu su babbu de cussu emendamentu. Sa ex Ministra Guidi, imbetzes, no est a suta de inchesta, mancari su cumpàngiu suo siat intre de is indagados.
  • Polèmicas pro Bruno Vespa e sa Rai, pro su seberu de àere trasmìtidu s’intervista, in su programma “Porta a Porta”, a su fìgiu de Totò Riina, Salvo, chi at de pagu publicadu unu libru chi contat de sa famìllia sua. S’azienda at naradu de èssere in su giustu. Sa commissione anti-màfia at cunvocadu sa diretzione de sa Rai.
  • Creschet s’iscàndalu “Panama papers”: 11,5 milliones de documentos, contos in is paradisos fiscales, persones in mesu intre de vip, polìticos e isportivos. Is documentos – furados o fatos girare a posta de calicunu- sunt lòmpidos in is manos de s’Icji, su cunsòrtziu de giornalismu de averìgua, in ue ddoe est s’Espresso puru, chi at publicadu is nùmenes de sa gente interessada.
  • Ant lassadu andare a Rolando Del Torchio, s’italianu de 56 annos furadu in su mese de ledàmine in is Filipinas. S’òmine, chi fiat istadu preìderu e istaiat in s’artzipèlagu dae su 1988, dd’aiant leadu sete òmines in unu locale chi gestiat dae tempus.
  • Sa politzia belga at arrestadu tres terroristas de cussos de is atentados de Bruxelles. Intre de is tres puru Mohamed Abrini, “s’òmine cun su cuguddu” de s’atacu a s’aeroportu de Zaventem. A cantu paret fiant giai aparitzende un’àteru atentadu in Frantza.
  • Est faddidu s’addòbiu intre de is indagadores italianos e egitzianos a pitzu de sa morte de Giulio Regeni. Is egitzianos no ant mancu intregadu is documentos de is telefonadas cun tzitadinos egitzianos. Su ministru Gentiloni at fatu torrare a domo s’ambasciadore italianu dae Il Cairo.

de Manuela Ennas