It’est sutzèdidu chida colada. Dae su 21 a su 28 de martzu 2016

Su resumu de is novas prus de importu de chida colada pro is giornales

Pìndulas. 21-28 de martzu 2016
  • Atacu terrorìsticu in s’aeroportu e in sa lìnia metropolitana de Bruxelles. Su nùmeru de is vìtimas est de 36 ma bi sunt galu ispèrdidos. Intro de is mortos puru una fèmina de orìgine italiana e una de orìgine sarda. Is duos terroristas chi si sunt fatos sartare in àera sunt duos frades, e dae is ùrtimas chircas paret chi unu siat passadu in Itàlia in s’istiu de su 2015.
  • Sa Die da sa Sardigna. S’assesora a sa cultura Claudia Firino at fatu ischire chi sa Giunta Regionale at seberadu su tema pro sa Die de sa Sardigna 2016. Sa Die at a èssere dedicada a is emigrantes e a su tema de s’integratzione sotziale. S’ispera – at naradu s’assessora – est chi custa non siat petzi una tzelebratzione ma un’oportunidade pro is giòvanos pro nche colare is disafios de s’Europa
  • Una Pasca de sàmbene in Pakistan. Unu kamikaze s’est fatu sartare in àera in su Iqbal Park de Lahore, acanta a su logu in ue fiant gioghende is pitzinnos. Prus de 70 is mortos e prus de 300 is fertos. A palas de s’atentadu terrorìsticu b’est sa truma talebana de Tehrik e Taleban Pakistan (Ttp) chi boliat fèrrere sa gente de fide cristiana.
  • Su tziclista belga Antoine Demoitiè est mortu.Teniat 25 annos. Rutu in sa gara de Gand-Wevelgem est istadu treuladu dae una mototzicleta. Mancari dd’apant portadu luego a s’ispidale de Lille, non b’est istadu nudda de fàghere.
  • Polèmicas pro su seberu de su Pd de lassare libertade de votu pro su referendum de su 17 de Abrile chi pertocat is berrinas in mare.
  • Bìsita istòrica de Barack Obama a Cuba. Sa primu borta de unu Presidente de is Istados Unidos pustis sa bellesa de 88 annos.
  • Est mortu a s’edade de 68 annos Johan Cruyff. Giogadore e allenadore de fùbalu de is prus istimados. Aiat bìnchidu tres botzas de oro. Teniat unu càncaru a is purmones.
  • Sìria. S’esèrtzitu de Assad, cun s’agiudu de is raid russos e de is fortzas sciitas, ant torradu a conchistare Palmira.Una pèrdida de importu pro s’Isis chi teniat su controllu de sa “ perla de su desertu” dae su maju de s’annu coladu.
  • Casteddu. Corteu de 4000 istudiantes e dotzentes de s’universidade contras a is ismenguaduras a s’istrutzione universitària chi at dae pagu detzìdidu su Guvernu. In primu lìnia ddoe fiant su retore Del Zompo e su sìndigu Zedda.
  • S’aberit bene s’istajone turìstica in Sardigna. Su tempus bellu at acumpangiadu sa Pasca manna. Totu prenu de turistas, chi ant pretziadu meda is ritos traditzionales de sa chida santa in totue.

De Manuela Ennas