It’est sutzèdiu cida passada. De su 28 de martzu a su 3 de abrili 2016

Su resumu de is novas prus de importu de cida passada po is giornalis

Pìndulas. 28 de martzu - 3 de abrili 2016
  • Su Vaticanu at abertu unu spriculitamentu apitzus de is traballus de sa domu de su Cardinali Bertone. Funt spriculitaus s’ex Presidenti e s’ex tesoreri de su Spidali Bambin Gesù, chi funt incurpaus de ai impreau dinai pùbricu po is traballus. Su Cardinali no est spriculitau.
  • S’est dispaciada sa Ministra de su Cresci econòmicu Federica Guidi pustis sa pubricatzioni in s’imprenta de calincuna intercetatzioni de su mesi de donniasanti 2014 intra de issa e su sposu suu Gianluca Gemelli. In is telefonadas sa Ministra assiguràt s’aprovatzioni de un’emendamentu chi, segundu is giugis iat a ai favorèssiu is interèssus econòmicus de su sposu apitzus de unu centru d’estratzioni de petròliu in Basilicata.
  • Est mortu a s’edadi de 84 annus Cesare Maldini. Est stètiu unu de is prus giogadoris mannus de su Milan, comenti su fillu Paolo. Cun su Milan at bìntu una Copa de is Campionis e cuàturu tìtulus italianus. At allenau puru sa natzionali italiana.
  • At a essi incarrerau in Bèlgiu Djamal Eddin Ouali, s’algerinu arrestau in sa provìntzia de Salerno, chi est incurpau de ai fabricau is documentus frassus po is terroristas de is atentaus de Bruxelles e finas de Parigi. Is spriculitamentus apitzus de su terrorismu islàmicu amostant chi s’Itàlia est unu gruxeri de terroristas.
  • Fayez Al Sarraj , su Primu Ministru inditau de su Guvernu d’Unidadi Natzionali de sa Lìbia, est arribau in Trìpoli. At nuntziau s’intrada in funtzioni de su guvernu suu, nàsciu cun su cunsensu de s’Onu. Ma su guvernu islamista chi no est riconnotu de sa comunidadi internatzionali ma cumandat de duus annus in sa capitali, at amaletzau al Sarraj de dd’arrestai.
  • Apple fait 40 annus. Su primu de abrili 1976 difatis Steve Jobs, Steve Wozniak e Ronald Wayne fundànt cussa chi oi est una de is prus sotziedadis arricas e de importu de su mundu.
  • Su Cunsillu regionali, cun unu retardu de tres mesis, at aprovau sa lei finantziària 2016. Est una lei chi ballit 7,4 milliardus de èurus e tenit s’obietivu de sanai su dèpidu de sa Sanidadi, chi est giai de 700 millionis de èuros.
  • Sa Delcomar at inghitzau su servìtziu de collegamentu intra de sa Sardìnnia e is ìsulas piticas. Sa sotziedadi at remplasau sa Saremar, sa sotziedadi de sa Regioni chi est in bèndida, bincendi s’arrendu po is ses annus benidoris. Funt otanta is traballadoris impreaus in Carluforti e in Madalena e cincu is navis chi ant a partiri de Palau, Portovesme e Cala de Sèda.
  • Su Guvernu smènguat is finantziamentus a favori de is lìnguas de minoria. Sa lei 482 de su 1999 chi giai s’annu passau teniat sceti 2.000.000 de èurus de finantziamentu, ocannu ndi tenit 1.600.000. Sa denùntzia est de su Coordinamentu pro su sardu ufitziale (Csu).

De Massimiliano Meloni