It’est sutzèdidu chida colada. Dae su 4 a su 10 de Ghennàrgiu

Su resumu de is novas prus de importu de chida colada pro is giornales.

Pìndulas 4-10 de Ghennàrgiu
  • Sa Corea de su Nord, pustis de un’esperimentu nucleare registradu dae totus is laboratòrios iscientìficos de su mundu, at annuntziadu de tènnere sa bomba H, a base de idrògenu. Bi sunt dudas dae is mannos de su mundu a pitzu de custa veridade. In ogni manera creschet s’avolotu cun Pyong Yang. Is Istados Unidos faghent bolare unu bombardiere a suba de s’istadu de su ditadore Kim Jong -Un.
  • Sighint is chistiones a pitzu de sa voluntade de su Presidente Obama de adotare provedimentos, puru contras a su parre de su Cungressu de is Istados Unidos, pro limitare e menguare s’impreu de is armas in sa sotziedade americana. In sa direta tv su Presidente at fatu s’annùntziu pranghe pranghe.
  • In Europa galu si faeddat de su chi est sutzèdidu sa note de annu nou in Colònia, cando deghinas de fèminas sunt istadas maletratadas dae unos cantos emigrados. Sighint is chircas de is autoridades tedescas pro agatare is responsàbiles. In su mentres s’opinione pùblica si intèrrogat in subra is problemas de s’immigratzione chi parent sena de controllu.
  • In Catalugna, pustis de is eletziones de tres meses a como, si lompet a sa risolutzione de sa crisi polìtica. Su leader de is indipendentistas Artur Mas, giai Presidente de sa Generalitat de Catalugna, at lassadu s’incàrrigu de fàghere su guvernu a su sìndigu de Girona Carles Puigdemont. Gasi is fortzas chi non ddu boliant immoe ant a sustènnere su guvernu imbeniente.
  • Non tenent agabbu is polèmicas a pitzu de s’aeroplanu de Istadu chèrfidu a forte dae su premier Renzi. Pustis de is crìticas pro cantu s’est gastadu, immoe si resonat de su ritardu pro sa cunsigna,chi a cantu paret dipendet dae is rechestas de Palatzu Chigi chi pertocant sa mobìlia .
  • Sa magistradura est chirchende de cumprèndere chi est beru o nono chi Rosa Capuozzo, de su “Movimento 5 stelle” de pagu eleta sìndigu de Quarto, tzitade de sa Campània, apat de a veras otentu s’agiudu de sa Camorra pro is eletziones.
  • In is tzìnemas de totu Itàlia resèssida manna cun ricavos de record pro “Quo Vado”, s’ùrtima pellìcula de Checco Zalone. Ma at fatu pesare polèmicas medas su parre chi su ministru Franceschini at iscritu in twitter. Pro issu custu resurtadu podet torrare a fàghere lùghere su tzìnema italianu.
  • In su portu de Casteddu est istadu firmadu e pustis postu a suta de secuestru unu tir carrigu de bestires regortos dae sa Caritas pro is chi nde tenent bisòngiu. A cantu paret fiant partende pro èssere bèndidos in is mercadeddos de Nàpoli. Pro immoe sunt chimbe a èssere acusados pro sa frigadura.
  • S’Assesoradu de sa Cultura de sa Regione Sardigna at fatu ischire cales pellìculas ant a otènnere su finantziamentu regionale. Est abarradu foras su progetu de su prèmiu Oscar Anthony La Molinara, chi bolet fàghere una pellìcula fantasy leende ispuntu de su traballu de su sardu Andrea Atzori “ Iskida della Terra di Nurak” ambientadu in su tempus nuràgicu. Sa cosa at abertu una dibata manna a pitzu de sa manera de ispartzire is finantziamentos pùblicos.
  • Paret cosa tzerta chi sa cumpàngia low cost Ryanair apat detzìdidu de lassare s’aeroportu de Casteddu pro ammanniare sa presèntzia sua in àteras regiones comente sa Sitzìlia e sa Pùllia. Sa cosa est forsis acapiada a una chistione de finantziamentos dennegados. Contrariedade manna intre de is sardos e mescamente de is emigrados.

de Manuela Ennas