It’est sutzèdidu chida colada. Dae su 7 a su 13 de martzu 2016

Su resumu de is novas prus de importu de chida colada pro is giornales

Pìndulas. 7 - 13 de martzu 2016
  • Massimo D’Alema non nde podet prus e narat su chi pensat de Ranzi. “ Renzi assimìgiat prus a Berlusconi che a s’Ulivo. Est distruende is reghinas de su Pd. Sa cultura de custu Pd est a tesu meda de comente fiat a printzìpiu. Dae custu puru nde lompet sa malaspètzia de sa manca italiana”
  • Est mortu pro neghe de un’atacu de coro, a s’edade de 74 annos, Ray Tomlinson, su babbu de sa posta eletrònica. Aiat imbentadu in is primos annos ’70 sa @, unu de is logogrammas prus impreados in su mundu digitale.
  • Trentino Alto Adige. Una frana de nie nd’est ruta dae su Monte Nevoso, in Badde Aurina. Su bilantzu est drammàticu. Ses mortos, chimbe italianos e un’austrìacu. Afrigimentu mannu in su mundu de is alpinistas.
  • Duos atacos cun armas chìmicas dae is jihadistas de s’Isis acanta a sa tzitade curda de Kirkuk. Est morta una pitzinna de tres annos, fìgia de Sameer Wais, est intre de is gherradores sciitas chi cumbatint contra a is jidhastas. Casi 600 is persones chi sunt abarradas avelenadas e meda àteras si nche sunt fuidas.
  • Mario Draghi torrat a nos ispantare. At agatadu un’acordu cun sa Banca Tzentrale Europea (Bce) chi immoe, gràtzias a un’ismanniamentu de su QE, at a pòdere comporare tìtulos de Istadu finas a 80 milliardos a su mese. In prus at abbassadu is tassos de interessu pro unu tempus longu meda.
  • Germània. Si votat in tres istados pro seberare is parlamentos regionales e su guvernadore nou. Sa chistione de is emigrantes at trasformadu custu votu in una genia de referendum pro comente Angela Merkel at portadu in antis su problema.
  • Custa chida puru su biàgiu eletorale de Donald Trump est istadu iscena de protestas. Sa politzia at fintzas firmadu calicunu de is chi fiant manifestende. A cantu paret unu de custos tenet ligàmenes cun s’Isis. In su mentres Trump abarrat su favoridu.
  • Polèmicas e dibatas a pitzu de s’ògiu de olia. Su Parlamentu Eu at aprovadu una lege chi permitit sa lòmpida in Europa de 35 mìgia tonnelladas de ògiu de olia dae sa Tunisia sena de pagamentos de dàtziu. e sa cosa at postu in avolotu su mundu de is massajos e de is assòtzios de categoria.
  • Cabuderra. Cummovidura manna a s’interru de Fausto Piano, su tècnicu de sa Bonatti mortu in Lìbia. Immoe sa famìllia e totu sa comunidade isetant rispostas prus craras pro cumprèndere mègius ite est sutzèdidu de a veras cando l’ant ochidu.
  • Dìnamo Tàtari. Esòrdiu pro s’allenadore nou Federcio Pasquini, tzerriadu pro chircare de adderetzare un’istajone difìtzile meda. “Depimus torrare a èssere comente a semper, cussos chi traballant tosturrudos ma cun su risu in buca” at naradu torrende pustis de chimbe annos in sa Dìnamo.

de Manuela Ennas