It’est sutzèdiu cida passada. De su 9 a su 15 de maju 2016

Su resumu de is novas prus de importu de cida passada po is giornalis.

Pìndulas. 9-15 de maju 2016
  • Eletzionis comunalis de Bolzano. Su 22 de maju s’at a tenni unu ballotàgiu po su sìndigu intra de su Centru dereta e de su PD. Arrennèscida manna po su movimentu de dereta estrema Casa Pound, chi at otènniu tres cunsilleris cun su 6,2 % de is votus.
  • Su Movimentu 5 steddus nc’at bogau a su sìndigu de Parma Federico Pizzarotti poita ca est spricullitau po sa nòmena de sa Diretora Generali de su Teatru Règiu. Polèmicas mannas poita ca su Movimentu no at fatu sa matessi cosa cun su sìndigu de Livorno Nogarin, spricullitau issu puru. Is cràstulus narant chi Pizzarotti no est biu beni de Grillo e de Davide Casaleggio comenti a Nogarin.
  • Po sa ministra Boschi, chi difendiat Renzi in sa Diretzioni de su PD, “chi at a votai no a su Referendum costitutzionali at a votai comenti Casa Pound”, eus a nai comenti sa dereta estrema. Sa minoria de manca de su PD s’est chesciada, ca est contra a s’arreforma de Renzi e duncas po su no a su Referendum.
  • Cun su votu de sa Càmera de is deputaus est stètia aprovada sa lei apitzus de is unionis tzivilis. Po Renzi est una dì de festa. Su mundu catòlicu est contràriu e tristu meda. Po su leader de sa Lega Salvini is sìndigus depint fai disparru de cuscièntzia e no apricai sa lei.
  • Torrant is protestas in Grècia contra a is tassas noas e a su smenguamentu de is pensionis. Tsipras fiat contra a is smenguamentus impònnius de s’Unioni Europea e immoi ddus acetat.
  • S’est dispaciau su Primu ministru de s’Àustria, su socialdemocràticu Werner Faymann. Fiat in càrriga de su 2008 ma at lassau s’incàrrigu pustis sa bìncida de sa dereta estrema de Norbert Hofer a sa primu torrada de is eletzionis presidentzialis.
  • Po su Premier Britànnicu David Cameron sa bessida de su Rènniu Uniu de s’Unioni Europea iat a podi essi unu perìgulu po sa paxi e sa stabilidadi de s’Europa. Mancat unu mesi a su referendum apitzus de sa Brexit, e po is sondàgius oi iat a binci s’eja a sa bessida.
  • Sa Fràntza est fraddoca po su suicìdiu de una picioca de 19 annus chi s’est ghetada asuta de unu trenu candu fiat in dereta in Periscope. Sa scena est stètia bida de milla followers.
  • Sa Presidenti de su Brasile Dilma Rousseff est stètia suspèndia po ses mesis de sa Presidèntzia. Su Senatu at nau eja a is giugis chi dd’incurpant de ai manucau is contus de su Stadu po essi elìgia un’àtera borta in su 2014. Manifestatzionis in totu su Brasile de cussus chi funt contra e de cussus chi funt a favori de sa Presidenti.
  • Hezbollah donat sa curpa a is jihadistas po sa morti de su cumandanti Amine Badreddine, bociu in Sìria. Po primu cosa si fiat pensau a unu raid israelianu.
  • Sa multinatzionali de is mexinas Pfizer at decìdiu de no donai prus is mexinas chi serbint po bociri is cundennaus a morti in is Stadus Unius.
  • Tramudat ancora sa compositzioni de su Consillu Regionali, sciumbullau de unus cantu de sentèntzias de is giugis aministrativus e de unus cantu de spriculitamentus penalis. Cida passada est intrau in Cunsillu Giovanni Satta de s’UDS, bessiu de presoni pagus diis primu, custa cida est tocau a Giancarlo Carta (FI), chi liat su postu de Antonello Peru (FI), in presoni issu puru.
  • Su Consillu regionali at votau s’arreforma de su traballu. Nascit un’Agentzia noa po is polìticas de su traballu chi liat aìnturu de sei is Tzentrus Servìtzius po su traballu (giai Ofìtzius de collocamentu).
  • Sa Sardìnnia conchistat tres bandieras blu in prus de su 2015: Badèsi, Tàtari e Teulada. Funt ùndixi is comunus premiaus de sa Foundation for Environmental Education. Is àterus otu cunfirmaus funt: Lungone, Madalena, Lu Palau, Casteddu Sardu, Sòssu, Aristanis, Tortolì.
  • Tristura manna in su mundu de sa cultura. Est mortu a Casteddu Pinuccio Sciola, artista sardu de Santu Sperau famau in totu su mundu, pruschetotu po is perdas chi sonant. Sciola teniat 74 annus.

de Massimiliano Meloni