Arreforma de is entis localis. A ita puntu seus?

Aprovada in su mesi de friàrgiu passau po immoi s’arreforma de is entis localis at fatu sparessi is provìncias regionalis ma est acapiada a s’arreforma costitutzionali natzionali

Arreforma de is entis localis sardus

Sa Regioni Sardìnnia at aprovau s’arreforma de is entis localis su mesi de friàrgiu passau.
Funt sparèssias is provìncias regionalis nàscias in su 2012 , Gaddura, Ollastra, Campidanu de Mesu, Meurreddia – Igresienti, annuddadas de unu referendum in su 2012.

Is territòrius de is provìncias de Gaddura e de Ollastra funt torraus a is provìncias stòricas, su primu a sa provìncia de Tàtari e su segundu a sa provìncia de Nùgoro. Po su chi pertocat Meurreddia – Igresienti e Campidanu de Mesu sa cosa est diferenti, ca sa provìncia de Casteddu no esistit prus. Su legisladori regionali difatis at ingendrau sa Tzitadi Metropolitana chi est formada de sa Tzitadi de Casteddu e de àterus 16 comunus lacanantis chi prima faiant parti de sa provìncia de Casteddu. Sa Tzitadi Metropolitana at a tenni is funtzionis de una provìncia. Sigumenti no nc’est prus sa provìncia de Casteddu, is provìncias de Campidanu de Mesu e de Meurreddia – Igresienti, impari a su territòriu de s’ex provìncia de Casteddu chi no fait parti de sa Tzitadi Metropolitana funt intraus in una provìncia noa, sa provìncia de sa Sardìnnia de bàsciu.

In sa spera de s’amministratzioni regionali custa provìncia noa at a morri in su benidori impari a is àteras provìncias storicas. A sa morti definitiva de totu is provìncias sardas, is Unionis de is Comunus ddas ant a arremudai e ant a liai is funtzionis insoru. Ma su benidori de s’arreforma sarda de is entis localis est acapiau a un’àtera partida chi funt gioghendi a livellu natzionali, eus a nai a s’arreforma costitutzionali propònnida de su guvernu Renzi e votada pagu diis fait de su Parlamentu. Perou cust’arreforma, chi prebidit intra de is àteras cosas s’annuddamentu de is provìncias, est issa e totu acapiada a s’arrennèssida de su referendum costitutzionali de su mesi de ladàmini chi benit.

Chi a su referendum costitutzionali at a binci su no a s’arreforma, at a essi cosa difìtzili chi is provìncias, chi ant a abarrai a livellu natzionali, sparessant in Sardìnnia. In su mentris perou, faendi contu de un’arreforma natzionali chi no est ancora definitiva e cun su bentu chi est sulendi no est nimancu scontau chi at a intrai in vigori, in Sardìnnia teneus cuàturu provìncias e una Tzitadi Metropolitana.

Po sa beridadi, a custas cuàturus provìncias tocat a aciungi puru is provìncias annuddaddas, chi funt sparèssias ma no funt sparessias etotu. Is ofìtzius funt ancora in atividadi, is entis tenint ancora unu bilànciu e sighint a tenni is funtzionis de a primu, mancai fatzant parti de un’ateru enti.

de Massimiliano Meloni