Fait a mesurai sa reputatzioni de sa genti? Po su Garante de sa Privacy no

Una sociedadi italiana at tentu s’idea de mesurai in manera ogetiva sa reputatzioni de sa genti, ma po su Garante de sa Privacy sa cosa est contra a sa lei.

Garante Privacy e reputatzioni digitali

Mesurai sa reputatzioni de sa genti. S’idea est de una sociedadi italiana, sa Mevaluate Srl, chi at inventau unu sistema scrocorigau perou de su Garante po sa Privacy.

Oi giai totus is aziendas spricullitant is identidadis digitalis prima de pigai unu a traballai.
Ma is acàpius personalis puru, in su mundu cumandau de internet, passant sèmpiri de prus intra de un’assindicadura de s’identidadi (digitali) de is personas. Podeus nai chi sa reputatzioni digitali precedit cussa reali e soventi dd’arremprasat.

E chi nci fessit una manera po calculai su livellu de reputatzioni de is indivìduus? Mancai po no permiti chi is novas liadas de una parti a s’àtera de internet ingendrint una reputatzioni diferenti de cussa reali? Mevaluate Italia srl promitit de nc’arrenesci.

Su sistema funtzionat prus o mancu de aici: cussus chi sa cosa dd’interessat, depint carrigai aìnturu de unu giassu internet totus is cartas chi tenint informatzionis de importu apitzus de sa reputatzioni cosa insoru. Intra de custas cartas nci funt su certificau de su casellàriu giuditziali, is certificaus de regularidadi fiscali, cussus chi pertocant abilitatzionis, diplomas, denùntzias, carelas, is provedimentus de s’autoridadi giuditziària. A custas cartas tocat a aciungi puru totus is informatzionis liadas de is artìculus de giornali e de sa ràdiu e sa televisioni. A custu puntu totu su traballu ddu fait un’ algoritmu, chi po mori de un’elaboratzioni de is informatzionis donat in manera “ogetiva” unu puntègiu a sa reputatzioni personali.

Po sa Mevaluate, su “rating reputazionale” podit cumbati is fenòmenus de ingigneria reputatzionali, est a nai de reputatzionis fraigadas aposta. Cuncurrit puru a spainai una cultura de sa valutatzioni fraigada apitzus de sa legalidadi, de sa calidadi e de sa meritocratzia, po no faltai in su scioberu de indivìduus, aziendas, entis e donai sa pròpria fidùcia a chi si dda minescit.

Po su Garante de sa Privacy perou una banca de is datus de sa reputatzioni andat contra is arrègulas de su Còdixi apitzus de sa protetzioni de is datus personalis e ingollit sa dignidadi de is personas. Cun su provedimentu n. 488/2016 difatis su Garante at nau no a su sistema de sa Mevaluate poita ca mesurai sa reputatzioni iat a podi ferri sa vida de is personas mesuradas, ponendindi barrancus a prestatzionis, servìtzius o benefìtzius. Po su Garante sa Mevaluate no est arrenèscia a espressai nimancu s’efficàcia e s’ogetividadi de s’algoritmu chi iat a depi mesurai sa reputatzioni.

Sa reputatzioni virtuali est sèmpiri prus unu problema, ca in su mundu de oi reali e virtuali funt casi sa matessi cosa. Sa persona 2.0 no tenit un’identidadi sceti, ndi tenit duas, una fìsica (reali) e una digitali (virtuali). Soventi is duas identidadis funt sa matessi cosa, ma àteras bortas funt cosas diferentis. A bortas s’identidadi digitali bincit e s’indivìduu dd’iat a bolli bogai po fai bessiri a pillu cussa reali. Est cussu chi iant a bolli fai is pentius de Facebook o de Twitter, chi scoberrint chi no bastat a si nci scancellai de is social network po nci bogai de internet is arrastus digitalis spaniaus aundisisiat in su web e chi cuncurrint a formai s’identidadi insoru e duncas sa reputatzioni puru. Arrastus spanius soventi in bonafidi: pensaus a is mammas e a is babbus chi ingendrant un’identidadi digitali de is fillus, ponendi in internet informatzionis finas de candu funt piticheddus.

de Massimiliano Meloni